113 tama'ita'i ua maua laisene ave ta'avale fua mai i le L.T.A.

Sui fa'au'u ua maua laisene fou e leai se totogi mai le L.T.A./ Blutv.

O le aso na fa'ataunu'uina ai le fa'au'uga a tina ma tama'ita'i e 113 na fa'amanuiaina i le polokalame a le Pulega o Fela'ua'iga i le Lau'ele'ele ma le Faletupe o le Lalolagi.

O lenei polokalame sa amata ona tatala le avanoa e lesitala ai tama'ita'i i le Masina o Me o le tausaga lenei 2023. I le saunoaga a le tama'ita'i Ofisa Sili o le Pulega ia Galumalemana Titi Schwalger i le sauniga e fa'auuina ai i latou fa'amanuiaina taumafaiga i lea polokalame. Sa ia ta'ua ai e tusa ma le 100 avanoa sa fa'amatu'u mo tama'ita'i, ae peita'i anei e o'o ane i le aso o le lesitala ua fa'atumulia le Ofisa i Vaitele ma Salelologa ma o lea sa fai ai le tonu o le 'a tu'u atu i luga le aofa'i o avanoa.

I le mae'a o le aso mo lesitala na fa'amauina ai le o'o atu i le 313 tama'ita'i na mafai ona fa'amauina mo lea polokalame, e 276 mo Upolu ae 37 sui o Savai'i.

Na fa'agasolo le vaega muamua o lea polokalame e ala lea i su'ega ma a'oa'oga amata ma i le taulauga ai o le Su'ega na fa'atino e na'o le 113 i latou na manuia le taumafai, e 98 mai i Upoulu ma le 14 mai Savai'i.

O le 'auga ma fa'amoemoe autu o le polokalame lenei, o le taumafai lea ina ia si'itia le numera o tama'ita'i ma tina 'ave ta'avale i Samoa ma ia ogatusa ai ma taumafaiga o le faiga ma avanoa tutusa.

I le saunoaga a Galumalemana i le taeao, sa ia ta''ua ai ni isi o vaega na fa'ailoa atu e tina ma tama'ita'i nei e mafua ai ona latou fia 'auai i lea polokalame e maua ai ni laisene aveta'avale.

O ni isi o nei mafua'aga, ona ua latou mana'omia se sa'olotoga e ave ai lava e latou le ta'avale ae e le gata i lea ua mana'omia foi ona fesoasoani atu i le tama o le 'aiga ma le tulaga lava o le fa'asala so'o i luga o le 'auala ona o le feoa'i fa'asolitulafono e aunoa ma se laisene ave ta'avale.

Na fa'afetaia e le Ofisa Sili le Faletupe o le Lalolagi ona o le lagolagoina malosi o lea fa'ama'ite taua.

O le agaga fa'afetai lava fo'i na fa'aali e ni isi o sui fa'au'u mai lenei polokalame ona ua mafai ona latou maua le iloa i tulafono o le auala aemaise o le avanoa taua ua taua'a'oina ai laisene ave ta'avale e aunoa ma se totogi.

Se tasi o tina na maua lana laise aveta'avale/Blutv.

O le igoa o le Polokalame lenei fa'aauau a le Pulega o Fela'ua'iga i le Lauele'ele ma le Faletupe o le Lalolagi o le Pilot Project.