E fa tausaga ma le ono masina le fa'asalaga fa'afalepuipui i Tanumalala ua nofosala ai le alii 40 tausaga le matua, ina ua ia ioeina ni gaioiga o sauaga fa'amalosi i se tama'ita'i 15 tausaga e iai ni ona a'afiaga tumau o le soifua.
E tusa ai ma afuaga o lea soligatulafono e pei ona fa'ailoa i se mau a leoleo, o le tama'ita'i sa ta'ele i le vaita'ele a le nu'u, ae o le fo'i mai ai o le ali'i lenei 40 tausaga le matua mai le fa'ato'aga na ia tau mai ai ma amata ai ona fai ai ni uiga mataga amalosi.
O lo'o ta'ua fo'i i le mau a leoleo, o le tama'ita'i lenei e iai lona pi'itaga i le ua molia, ma o lea na o'o ane ai le 'aiga i le lata i le 9 masina talu ona fa'atino nei gaioiga ma lipoti ane i le Ofisa o leoleo.
E le'o se tulaga matagofie i le silasila a le Fa'amasinoga le lipotia pea o nei gaioiga, ae o lo'o iai le fa'amanatuina o le 16 Aso o fa'alauiloa i auala e tetee atu ai i Sauaga i 'aiga e a'afia ai tamaitai, tina ma fanau teine.
Comments