O tausaga ta'itasi e usuia ai le fono tele a le Ekalesia Fa'apotopotoga Kerisiano Samoa e le mafai lava ona tu'u aunoa e se tasi o sosaiete a le Ekalesia le masani o le foa'i ma agalelei i le Matagaluega o Soifua Maloloina e pei ona iai fo'i le fo'ai tupe e $70,000 tala.
O le manulauti o lenei agalelei e fesoasoani ai i taumafaiga ma le auaunaga a le Matagaluega o le Soifua Maloloina aua le soifua manuia o le mamalu lautele o si o tatou atunu'u.
O lea foa'i ua mafai ona vaevaeina i vaega po'o auaunaga eseese a le matagaluega o Soifua maloloina e aofia ai le $30,000 mo le falema'i fa'amama toto i Upolu, $20,000 mo le falema'i fa'amama toto i Savai'i, $10,000 mo le falema'i tele i Moto'otua ma le $10,000 mo le falema'i i Tuasivi i Sava'i.
O nei foa'i ua agalelei ai le Soisaiete o le Tautua Puapuaga o Tagata ma le fa'amoemoe ia si'itia ai tulaga o auaunaga ma le fa'agasologa o galuega fai a vaega ta'itasi o lo'o i lalo o le fa'amalumaluga a le Matagaluega o le Soifua Maloloina.
O le afioga i le Fa'atonu sili o le Matagaluega o le Soifua Maloloina le Afioga ia Aiono Alec Ekeroma sa fai ma sui o le Matagaluega e fa'afetaia le Ekalesia Fa'apotopotoga Kerisiano Samoa ma le Sosaiete fa'apea ai ma le taliaina o lenei foai tupe e $70,000.
Comments