Ata Pu'eina: Samoa Police.
E tusa ma le 8 ni uila vili vae e fai o latou afi na foa'i e le malo tele o Ausetalia i le Matagaluega o leoleo a Samoa, e fesoasoani lea i galuega mo puipuiga, aemaise o le agai atu ai i le taligamalo a Samoa i le tausaga fou i le masina o Oketopa.
O nei uila vili vae e alu i le eletise pe fai o latou afi, e tusa ma le $80,000 tupe Ausetalia lona tau.
O le 'a tu'uina atu nie meatotino po'o aseta a le Matagaluega, i le vaega o lo'o va'aia uila aua le fa'atinoina o galuega fa'aleoleo i le puipuiga o vaega o le taulaga ma le mata'ituina.
O le afioga i le Komesina o le Matagaluega o leoleo ia Auapa'au Logoitino Filipo, na saunoa e fa'afetaia le foa'i a le malo o Ausetalia e tauala mai i le Australian Federal Police.
Saunoa le Komesina, o lenei fesoasoani tele a Ausetalia o le 'a fesoasoani tele lea i galuega ma 'au'aunaga ese'ese a le Matagaluega i le atunu'u.
Ua talafeauga le taunu'u o nei uila eletise, ae mae'a loa ona fa'au'u ni isi o leoleo e 20 sa a'otauina i tomai fa'a ave uila ma o le 'a fa'apena ona fa'aaoga ai o latou tomai fou ua maua i nei aseta aoga mo le puipuiga o le atunu'u.
O nei uila, ua mae'a fo'i ona fa'atotogaina i vaega mana'omia mo le galuega; e pei o 'ato, moli fa'ailoilo ma le sailini.
Uila Vili Vae Afi/Electric Bike.
O le uila vili vae afi, o se uila vili vae lava ae ua fa'aaopoopo iai ma lona ma'a e alu ai; e mafai lava ona vili ae a fa'apea ua a'e i se a'ega po'o se nofoaga maualuga ona fa'aaoga lea lona afi e faigofie ai ona a'e i luga, ae o le isi itu e saosaoa atu le uila lea nai lo'o le uila vili vae sa'o e leai se ma'a po'o se afi.
Comments