O le taeao nei ua amata aloa'ia ai su'ega fa'ai'u faitaulia a fanau o lo'o aotauina i a'oga tulagalua a le atunu'u.
O nei su'ega e aofia ai le vasega 4, 6 ma le 8; o su'ega nei e sailia ai avanoa o fanau mo le isi la'asaga aemaise o le vasega 8 e sailia ai avanoa mo se 'aoga i kolisi e mafai ona aga'i iai pe 'a mae'a le tulagalua.
I le fa'asologa o su'ega a le fanau mo lenei vaiaso, o le vasega 4 e amata i le 9am e fa'amoemoe e mae'a i le 10am, o le vasega 6 e amata ile 9am ae mae'a i le 10:45am ma le vasega 8 e amata i le 9am ae ma'ea su'ega i le itula e 11:15am. O le fa'atulagaina ia o su'ega mai lava i le Aso Gafua i le Aso Faraile.
O le vasega 4 ma le 6 o lo'o su'e i le su'ega e fa'aigoaina o le Samoa Primary Education Literacy Levels(SPELL), o le fa'amoemoe o nei su'e e fa'alelei atili ai le faitau tusi ma le tusitusi a fanau.
O le vasega 8 po'o le tausaga fa'ai'u o a'oga tulagalua o lo'o su'e i le su'ega o e Samoa National Assesment Primary Education(SNAPE), po'o su'ega nei e sa'ilia ai le tulaga o tomai o fanau sa maua mai i le la'asaga o aoga tulagalua a Samoa ma tapena ai mo le la'asaga o a'oga maualuluga.
O le mae'a o su'ega nei ona fa'agasolo ai lea o su'ega masani a a'oga e sailia ai tulaga o fanau i totonu o a'oga.
O le aso 13 o Novema ua fa'atulaga e amata ai su'ega a le vasega 12 ma le vasega 13 e saili ai ni a'oga i Iunivesite mo le tausaga fou.
Comentarios