PC: Parliament of Samoa.
O le asō e faamoemoe e faamae'aina ai le fonotaga lona 40 a le Faalapotopotoga a Palemene mo Malo o le Taupulega, o loo faia i Brisbane, Ausetalia na amata mai i le Aso 1 o Novema 2023.
I se pepa o faamatalaga mai i le Palemene o Samoa; ua faailoa ai, O le autu o lenei Fonotaga o le “Avea ma Sui mo le Lumanai: Tupulaga Talavou ma le Palemene” .
E lē i lalo ifo ma le 70 sui auai mai ni isi o atunuu o lenei itūlagi o Mālō o Taupulega o loo auai e aofia ai ma Samoa.
"E silia ma le 60 Sui Auai o lenei fonotaga. O lo o auai atu ai foi ma le usugafono mai Samoa, e aofia ai le Tofa Auuapaau Mulipola Aloitafua Mulipola, Sui Fofoga Fetalai, Tofa Hon. Lauofo Fonotoe Nuafesili Pierre Lauofo, Sui Taitai o le Itu Agai, ma Vaafusuaga Toomaga Iole Sanerivi, Faauluuluga o le Vaega Faaliliu Upu i le Ofisa o le Failautusi."
O le afioga i le sui fofoga fetalai o le Palemene o Samoa, na filifilia e fai ma sui taitaifono o lea fonotaga, e pei ona sa fa'atūina e le Fofoga Fetalai a Le Atu Kuki ma lagolagoina e ana sui auai.
"Na filifilia le Afioga i le Sui Fofoga Fetalai, Tofa Auuapaau M. A. Mulipola e avea ma Sui Taitaifono mo lenei fonotaga e pei ona sa faatuina ai e le Fofoga Fetalai mo le Palemene o le Atu Kuki ma faamaonia e sui auai."
E lua ni matā'upu o le 'ā fai iai folasaga, ma ua tapena ai sui usufono a Samoa.
"O le a faia folasaga a Sui Usufono i luga o mataupu nei:
1. Avea ai ma Sui ma le taua o le Auai (Tofa AUUAPAAU M.A. Mulipola);
2. O aafiaga o aoaoga faa-Palemene mo le auai ai o tupulaga talavou i upufai o Malo (Hon. LAUOFO Fonotoe N. P. Lauofo)".
O Samoa ua faamoemoe e talimālō i lea fonotaga faapalemene i le tausaga fou 2024 i le masina o Oketopa.
Comments