O se tala fiafia mo Samoa le maualuga ma le mao'ae o le taumafaiga a Alex Rose o se ali’i Samoa o lo’o ta’aalo i le ta’aloga o le togi pulu salafalafa po’o le discus se matati’a mo le Oceania i le mamao o lana togi e 71.48 mita le mamao.
O Alex Rose ua tele tausaga o ta’alo i le ta’aloga lenei o le togi pulu salafalafa, ma sa ia ta’alo ma tauaveina le igoa o Samoa i le tele o ta’amilosaga ma ta’aloga fa’avaomalo e aofia ai ta’aloga o le Oceania, ta’aloga mo Malo Taupulega ma ta’aloga o le Pasefika ma le Olimipeka.
Ua 31 tausaga le matua o lona soifua ma sa pine auro i le tele o ta’amilosaga a le Pasefika e iai le ta’aloga o le Oceania i le tausaga e 2017 sa pine auro ai i le togi pulu salafalafa.
O se itu lelei tele le matati’a ua fa’atuina e Alex Rose i ta’aloga o le Oceania e pei ona iai le matati’a e 71.48m le mamao, a’o tapenapena ma fa’asauni atu ai i ta’aloga tele o le Olimipeka i le fa’aiuga o le tausaga nei i Pale i Farani.
O lo’o fa’atulaga mai lenei ali’i Samoa i le tulaga 11 o le fa’atulagaina o ‘au ta’aalo uma mo le togi pulu salafalafa o le lalolagi, o ia e to’alua iai tagata ua ova ma le 70 mita le mamao o le togi i le ta’aloga lenei o le discus throw, ma o ia lea ua umia le matati’a mo lea ta’aloga e le gata i Samoa nei ae o le Pasefika atoa.
Comments