E fia alu i Ausetalia na mafua ai na lafi totonu o le Fiji Airways.

10 Ianuari 2023.

E le'i iai ni moliaga ua faia e fa'asaga i se tama'ita'i lea na sao atu i totonu o le va'alele a le Fiji Airways e aunoa ma se iloaina e latou na fa'agasoloina ma faia siaki a le pasese a le va'a i le masina na tuana'i o Tesema 2022.

O le tama'ita'i lenei na lafi i totonu o le fale lē ta'ua a le va'alele e fa'amoemoe e sola ese atu ma Samoa ma le nauanauta'iga ina ia malaga atu i Ausetalia.

O le taunu'u ai o le malaga a le va'alele i Fiti na maua atu ai e se tama'ita'i faigaluega o lo'o moe le teine lenei i totonu o le fale lē ta'ua i le malaga a le va'a i le aso 26 i le mavae ai o le Kersimasi o le tausaga na tuana'i 2022.

Na toe fa'afo'i mai lava i lea aso lenei tama'ita'i i Samoa ma su'esu'e ai loa e leoleo, tā'ua e le afioga i le Komesina o Leoleo le tōfā ia Auapaau Logoitino Filipo; e maualuga fa'asalaga e ono molia ai lenei tama'ita'i ona ua ia solia se tasi o tulāfono maualuga fa'avaomalo o femalagaina.

Na saunoa le Komesina, o lenei tama'ita'i e pei o lea sa fia malaga i Ausetalia ma o lea fo'i na ia fa'apea ane i le pulega a le va'alele o le Fiji Airways o ia o le tagatanu'u o Ausetalia; na saili fa'amaumauga a le ofisa malaga a Ausetalia ma fa'amaonia ai e le'o se sitiseni Ausetalia lenei tama'ita'i.