Peresetene Lakapi Liki Samoa, Fiu Ponifasio Vasa.
O le afiafi nei ua fa'amoemoe e tatau ona fa'alauiloa aloa'ia ai le lisi o le Toa Samoa mo le ta'aloga o le Pacific Championship lea e amatalia i le Aso 14 o Oketop 2023.
O le ta'amilosaga lenei e tolu 'au o lo'o auai, o le 'au lakapi liki a Ausetalia, Niu Sila ma Samoa.
O le masina na mavae atu o Setema na fa'alauiloa ai le filifilia ai o faia'oga fou ma le Pulega a le Toa Samoa ina ua fa'amavae le susuga ia Matt Parish lea sa tau'aveina le 'au a le Toa Samoa i le silia ma le 10 tausaga.
E le gata i lea ae o lea fo'i iai suiga i le pulega o le Lakapi Liki Samoa, e pei ona filifilia ai nei le susuga ia Fiu Ponifasio Vasa e avea ma Peresetene.
Na maua se avanoa e talanoa ai ma le Peresetene ia Fiu e tusa o tapenaga a le Toa Samoa mo lea ta'amilosaga fa'avaomalo a le Pasefika o lo'o loma nei i le Aso 14 o Oketopa 2023.
Saunoa Fiu, o lea ua tapena le Toa Samoa ma o lea fo'i ua mae'a ona fili le 'au mo le Pacific Championship; ua iai le fa'amoemoe e fa'alauiloa i se taimi o le afiafi nei po'o le aso Lulu, o le 'a fa'asalalauina tu'usa'o mai i Brisbane, Ausetalia e le susuga i le faiaoga ma le pulega a le 'au lakapi o lo'o iai.
Ua fa'ailoa fo'i e Fiu, o le taimi nei ua fa'amautinoa mai o lo'o aofia uma alo ma fanau a le atunuu lea na ta'a'alo i le Ipu o le Lalolagi, se'i vagana le tama ta'alo o Jarome Luai o lo'o iai nai lu'itau i ona manu'aga mai i le ta'aloga i le fa'ai'uga o le vaiaso; ma e iai le fa'amoemoe e ono le mafai ona ta'alo i lea ta'amilosaga.
O le susuga ia Ben Gardiner filifilia e avea ma faia'oga fou o le Toa Samoa, o Ben sa faia'oga lagolago i le 'au a le Penrith Panthers a Ausetalia.
O le ta'aloga muamua a le Toa Samoa o le 'a ta'a'alo ai ma le 'au malosi a Ausetalia i le Aso 14 o Oketopa 2023 a'o le'i malaga ane ai i Niu Sila i le la ta'aloga ma le Kiwi i le aso 21.
תגובות