Fa'aaopoopo le $50 mo Penisione a tagata matutua mo le tolu masina o le 2023.

21 Tesema 2022

Mulipola Anarosa Ale Molio'o (Minister of Finance)

Ua mae'a nei ona folasia i le laulauafono a le Palemene o Samoa le Tala Fa'atatau Fa'aopoopo Muamua o Tupe 2022/2023 i le fono usu mulimuli a le Palemene i le Aso Lua 20 Tesema 2022.

I le folasaga a le Afioga i le tama'ita'i Minisita o Tupe Afioga Mulipola Anarosa Ale Molio'o, ua ia fa'ata'atia ai i le laulauafono a le Maota Fono o Samoa le tala fa'atatau fa'aopoopo muamua o tupe o lenei tausaga 2022 i le 2023.

I ni isi o vaega taua o lenei tala fa'atatau faaopoopo o tupe na folasia, e aofia ai le fa'aopoopoga lea o le $50 mo penisione a tagata matutua lea ua fa'amoemoe mo masina o Aperila, Me ma Iuni o le tausaga fou 2023.

O lenei fesoasoani o le'a faamanuiaina ai uma tagata fai peneisione e tusa lea ma le 11, 320.

E le gata o le'a fa'aopoopo le $50 mo penisione a tagata matutua, ae ua folasia fo'i le fa'aopoopoina lea o le $50 mo tagata e iai A'afiaga Tumau o le Soifua mo Masina o Aperila ma Me o le tausaga 2023.

I le aotelega lava o tupe maua a le atunu'u i lalo o lenei Tala Fa'atatau Fa'aopoopo Muamua o le Tupe, e tusa lea ma le $6.6 miliona.