Minisita Lagolago o Faatoaga ma Faigafaiva, Afioga Maiava Fuimaono T. Asafo| Ministry of Agriculture and Fisheries.
O le Minisita Lagolago o Faatoaga ma Faigafaiva, Afioga Maiava Fuimaono T. Asafo ma le Pule Sili Lagolago, Vaega o Laau Tanu Mr. Tanu Toomata o loo fai ma sui o Samoa i le fonotaga fa'aminisita e talanoaina ai tulaga i la'au toto ma niu i totonu o le atunuu o Indonesia po'o le 'International Coconut community 59th ICC Session & Ministerial Meeting' i le vaiaso nei na amata mai i le Aso 5 i le aso 7 o Novema 2023. O Samoa o lo'o avea ma sui o lenei fonotaga talu mai le 1975.
E 21 atunuu o lo'o latou gaosia ni oloa e fa'aaoga ai le niu, e silia ma le 90 pasene o oloa gaosi mai le popo o lo'o auina atu i fafo i atunu'u ese'ese o le lalolagi.
O le manulauti autu o le fonotaga lenei, o le unaia ma le mata'ituina lelei o ia alaga'oa ma alamanuia e maua mai i le popo i le lalolagi atoa, mo le manuia gafataulimaina o soifua o le faitau miliona o faifa'atoaga laiti faapea ai ma i latou o loo galulue i le gaosiga ma le maketiina o oloa o le popo.
O le Minisita Lagolago le Afioga Maiava Fuimaono T. Asafo na maua le avanoa e tuuina atu ai se saunoaga e fai ma sui o atunuu o le ICC e tatala aloaia ai le fono. Na ia fa'ailoa manino le taua o feso'ota'iga ma taumafaiga tu'ufa'atasi a atunu'u uma o le ICC ina ia mautinoa e fa'atumauina fa'amoemoega tau atina'e mo le saogalemu o taumafa ma le maua o taumafa lelei mo o tatou tagata, a'o fa'atupuina le tamaoaiga e ala i le si'itia o 'oloa auina atu i fafo o a tatou popo.
I le taimi lava e tasi, e tatau fo'i ona faʻamalieina le siosiomaga e ala lea i taumafaiga e faʻaitiitia le suiga o le tau ma le vevela o le lalolagi e ala i le toe totoina o la'au. Na fa'amanatu fo'i le Minisita Lagolago, e tatau ona fa'aauau pea ona lagolago ma fa'amalosia le galulue fa'atasi a atunu'u o lo'o totōina le niu .
Minisita Lagolago o Faatoaga ma Faigafaiva, Afioga Maiava Fuimaono T. Asafo ma le Pule Sili Lagolago Tanu To'omata.
Na ia fa’ailoa fo’i lu’itau o lo’o feagai ma le Pasefika e aofia ai ma Samoa e fa’atatau i le maualuga o le afaina o le niu ona o iniseti fa'alafua po'o manu 'ainiu. Na ia fa'ailoa ma una'ia fa'alapotopotoga ma pa'aga i le fesoasoani e fa'atupe ni fesoasoani e mafai ona fa'atino ma fa'aauau ai pea ona fai ni galuega puipui mo le lumana'i o le niu i le nei itulagi ma le lalolagi atoa.
O le lipoti a Samoa e uiga i le niu a le atunuu o lo o faagasolo pea ma agai i luma na fofogaina foi e le Pule Sili Lagolago ia Tanu Toomata i le taimi o le fono.
Comments