O le mea e lelei i Upolu e tatau fo'i ona lelei i Savai'i o se fa'aupuga sa tu'ulafoa'i e aunoa ma se uiga moni e tatau ai ona fai peita'i ane talu ona seei atu uafu e lua a Samoa le uafu i Mulifanua fa'apea ai ma Salelologa i lalo o le ta'ita'iga ma puleaga a le afioga i le Minisita o Galuega Tetele a le malo ma Fela'uaiga le afioga ia Olo Fiti Vaai ua tele suiga i nofoaga fa'atali va'a ma fa'ae'e ai va'a mo le mamalu lautele o le atunu'u.
O le aso Faraile o le vaiaso na mavae atu aso 5 o le masina o Iulai sa tatala aloai ai le toe fa'afouina o le nofoaga e fa'atali ai va'a ma fa'ae'e ai mo le motu tele i Salafai o se tasi o galuega sa ave iai le fa'amuamua a le Minisita ma le Matagluega o Fela'uaiga ma Galuega Tetele a le Malo ina ia fa'amaea aua lava le fa'aaogaina e tagata lautele o Samoa ma i latou uma o lo'o femalagaa'i i le va o Upolu ma Savai'i.
O lenei galuega e aofia ai le toe fausia o le nofoaga e nofonofo ai tagata i le fa'atali ina o le va'a ma le pu'eina o le va'a ae le gata i le o le nofoaga e faaoga e tagata matutua ma le au pensione fa'apea ia le vaega e fa'atali ai pasese fa'apitoa po'o VIPS ua mautu fo'i ma le itu ua fa'aaogaina e tagata faipisinisi ua iai faleoloa ma so'o se auaunaga mo le fa'aaogaina e tagata ua uia lenei uafu i Salelologa, ua moni ai loa i le upu "ole mea e lelei mo Upolu e tatau fo'i ona lelei mo Savai'i".
Comments