Magafā i Vaimoso : Photography by Nah Folasā/Blutv.
Ua fautuaina Samoa e le Ofisa o Va'ai Tau, i le nofo sauni mo Savili mālolosi, timuga mamafa ma lologa i le taeao nei.
I le vaveao o le Aso Faraile 3 o Novema 2023, na molimauina ai le mālolosi o savili tō fa'ata'uta'u ma timuga mamafa i vaega uma o Samoa, ae i le malama o le taeao na lipotia ai ni isi o nofoaga i le taulaga ua maualuga le suāvai ona o timuga.
O vaega i saute ua lipotia ai foi le toe solo o le palapala i luma o 'auala aemaise o le pāpā ai o Vaitafe.
O le aso 31 o Oketopa na faailoa ai e le Vā'aitau, ni afā e 2 i le 3 e faamoemoe e afea Samoa i le vā o Novema ma Aperila.
I le lipoti lata mai o le tau ua faailoa mai ai fautuaga malosi mo le atunuu aemaise o gataifale uma o Samoa.
"FA’AMĀLOSIA: LAPATA’IGA O TIMUGA MAMAFA
FA’AMĀLOSIA: FAUTUAGA MO LŌLŌGA
FA’AMĀLOSIA: FAUTUAGA O SAVILI MĀLOLOSI
O uiga susū ma auaoa o le tau o lo’o ufitia ai pea le atunu’u. E āfua mai se vaega o fetaia’iga o savili ma timuga fa’atasi ai ma savili e feololo le malolosi o le Matā’upolu e 45-55 kilomita i le itula o lo’o aga’i mālie mai i Matu-i-Sasa’e. O lea tulaga e ono ta’ape solo ai timuga, e mamāfa fa’apea uila ma faititili ma savili e fa’ata’uta’u i nisi o taimi mo le asō. O nei uiga loulouā o le tau fa’aauau ona a’afia ai le atunu’u se’ia o’o atu i le fa’ai’uga o le vaiaso. O lea e fa’amālosia ai pea Lapata’iga o Timuga Mamafa fa’apea Fautuaga mo Lōlōga ma Savili Mālolosi mo Samoa.
A’afiaga e ono ālia’e mai:E timuga ma mamāfa i ni isi o taimi, e puaoa ma mase’ese’e auala i nofoaga maualulūga, e ono lolovaia nofoaga i tafatafāala fa’apea savili e tō fa’ata’uta’u i taimi o timuga."
Comments