Photo Supplied: The Museum of Samoa.
O se tasi nei o vaega taua o lo'o ave iai le fa'amuamua ma le fa'ataua a le malo o Samoa aua le teu maluina o aseta e patino ia Samoa mai anamua ma pine fa'amau fa'apea ai ma fa'amaumauga i tala fa'asolopito o Samoa.
O le itu fo'i e taua tele ai mataaga, e man'omia tele aua le asiasi ma le tafafao mai o tusrisi ma tagata asiasi mai i isi atunu'u i Samoa nei e maua ai le avanoa e molimauina le tulaga sa iai Samoa i lea tausaga ma lea tausaga e fua i luga o tala fa'asolopito ua mafai ona fa'amaumauina e fale mataaga eseese i totonu o le atunu'u.
Ua sauni nei fale mataaga uma o Samoa i le fa'amanatuina o lea aso mo Samoa lea o le a fa'atautaia ma fa'atino i le aso 18 o le masina lenei o Me 2024, o le sini autu ua fa'aulutalaina e fa'apea ''Fale Mataaga Mo Aoaoga ma Suesuega''.
E tele le aoga o lenei aso fa'apitoa fa'avaomalo mo fale mataaga uma o le lalolagi aua le teu maluina puipuia ma le fa'aauau pea ona fa'aolaola tala tu'u, tala o le Vavau ma measina ina ia si'itia le tomai male iloa o alo ma fanau Samoa i tulaga o a'oa'oga ma le fa'asoaina o le iloa i tu ma aganu'u fa'a Samoa.
E tatala le avanoa i so'o se fale mataaga i totonu o Samoa nei e fa'aali ai measina ma fa'asoa auala e mafai ai ona fa'aauau pea nei galuega lelei ina ia mautu le so'otaga o alo ma fanau Samoa o lo'o tuputupu a'e ma le aganu'u fa'a Samoa moni.
Comments