Fa'amatalaga o le ata: Faletusi fou ua mae'a fa'atotogaina a le a'oga tulagalua a Letogo| Ata Pueina- Savali Newspaper.
28 Aukuso 2023: E tolu ni poloketi tetele a le nu'u o Letogo na tatalaina i le vaiaso ua tuana'i e tauala mai lea i lalo o le latou Poloketi o le tasi miliona tala mo itumalo.
O nei poloketi ua ave ai le fa'amuamua a le pulega ali'i ma faipule o le afio'aga o Letonu i le tapenaina lea o le lotoifale fa'alea'oa'oga a le fanau. O le faletele(hall) e tua iai le fanau i polokalame fa'atino, o le faletusi aua le atina'eina pea o le soiufa faitau tusi a le fanau aemaise o se vai e feinu ai(water fountain).
Na molimauina e le afio'aga ma le Itumalo lenei atina'e taua aua alo ma fanau o le afio'aga.
O le afioga i le ali'i Minisita o Aoga, Ta'aloga ma Aganu'u ia Seu'ula Ioane sa lauga e tatala aloa'ia lenei fa'amoemoe ua tino mai aua alo ma fanau o le afio'aga o Letogo.
I le saunoaga a le afioga i le Minisita, na fa'amanatu ai ni isi o vaega taua i le soifua ma le ola a'oa'oina o fanau e ao ona ave ia le taula'i ma le fa'amuamua a so'o se malo.
"The three basic domains of a childs educational development, o le itu i le Tino, o le mafaufau ma le itu fa'aleagaga".
O le saunoaga lea na toe fa'apupula e le afioga i le Minisita i lea sauniga taua i le pa'ia o le afioaga aemaise o fanau a'oga.
Sa fa'afetaia e le afioga ia Seu'ula le lagolago a matua aemaise o le pulega a lii ma faipule o le Itumalo ma le nuu o Letogo ona ua mafai ona tino mai lenei poloketi taua ae o se fa'ama'ite lelei ma aoga tele mo le soifua auiluma o fanau lalovao o alo ma fanau a le afio'aga.
O le Poloketi o le $1 miliona lea na to'ese mai ai se seleni e fa'atino ai lenei poloketi i le talitonuga o le lumana'i o le nu'u ma ona atina'e e fofoa mai lea i se faletele, faletusi ma se falea'oga lelei.
Comments