Fa'asaoina soifua mai i se fa'alavelave tau ta'avale afi.

Lipotia: Demetrius Ah Mau.

2 Setema 2023: O le itula e 12:00am i vaveao o le Aso Toonai na tula’i mai ai se fa’alavelave tau ta’avale mai le afioaga o Lauli’i. Na lolofi ane sui o le afioaga ma fesoasoani e tau lavea’i le pasese o le pikiapu o lo’o fetoai ma le maa i le itu taumatau.

E lua ta’avale na aafia o le taavale itūaiga o le VOXY na aga’i mai le itu taumatau e fuafua mai mo Apia, fa’atasi ai ma le pikiapu na aga’i atu i le itū tau agavale.

E le’o mautinoa lelei le mafuaaga tonu na lavevea ai nei ta’avale, ae e le’i umi se taimi talu ona tula’i mai le fa’alavelave ae sasao a’e loa ma le mu I le VOXY. Na fa’anatinati atu le ave ta’avale o le pikiapu i le falema’i ona o lo’o iai ona manu’aga i lona fatafata, ae e le’o iai se isi ua fa’amaonia ua maliu.