Fa'ase'e le Ofisa Tausi Mavaega i le nofoaga tuai o le Samoa Housing Coporation.

O le taeao nei tatala ai le nofoaga o le Ofisa Fou o le Tausi Mavega a Samoa i le nofoaga sa avea ma Ofisa o Fale(Samoa Housing Coporation) i Matafele.

O le susuga i le fa'afeagaiga E.F.K.S i 'A'ai o Niue na saunia le sauniga lotu e tatala ai lenei fa'amoemoe taua.

O le afioga i le sui Palemia o le Minisita foi o le Ofisa Tausi Mavaega ia Tuala Iosefo Ponifasio na saunoa i le saunoaga autu e tatala ai lea Ofisa i lona nofoaga fou.

Saunoa le Sui Palemia, o le taua o le fa'ase'e mai o le Ofisa Tausi Mavaega i lona nofoaga fou, ina ia mafai ai lava ona tumatila le Ofisa aua lava le fa'atinoina o ana auaunaga ma tiute mo le atunu'u.

O le Ofisa Tausi Mavaega, e fesoasoani lea i le tapenaina o mavaega tausi ma mavaega tusia(wills) a le atunu'u, i ni tagata e mafai ona tausia aseta pe 'a maliliu ma o lona taua lea i tagata o le atunu'u o lenei Ofisa, ina ia mafai ai ona mautinoa e iai tagata e latou te tausia aseta ma meatotino pe 'a mavae le olaga nei.

Na fa'afetaia fo'i e le Minsita o Tausi Mavaega ni isi o tamali'i sa avea ma tausi mavaega a le atunu'u aemaise o lenei Ofisa.