O lo'o talia nei e le Kapeneta se lipoti a le loia sili e tusa o le su'esu'eina o le mata'upu i mafua'aga na maliu ai le taule'alea o Tu'u'au Fa'asavalu i Vaitele Fou i le aso 21 o Aperila o le tausaga e 2021.
I le masina o Setema sa fofogaina ai e le afioga i le Sui Palemia ia Tuala Iosefo Ponifasio se fa'ai'uga a le Kapeneta, ina ia fa'ase'e le su'esu'eina o le mata'upu lenei i le Ofisa o le Loia Sili.
O faila uma o lea mata'upu atoa ai ma molimau sa i le Matagaluega o leoleo ua fa'ase'e uma ane i le Ofisa o le Loia Sili.
Peita'i ina ua fesiligia le afioga i le Sui Palemia i se tala lata mai o lea mata'upu, ae na fa'aalia o lo'o fa'atali pea le Ofisa o Loia Sili a le malo i se lipoti e tu'uina atu lea i le Kapeneta.
O le isi tulaga na fofogaina, o le aumai lea o leoleo su'esu'e fa'apitoa mai i Niu Sila e su'esu'eina lea mata'upu aemaise o le fa'ase'e ese ai o le afioga i le Minisita o Leoleo ia Faualo Lefau Harry Schuster mai le su'esu'eina o le mata'upu ona o ni so'otaga fa'ale'aiga ma se tasi o lo'o masalomia.
Ua lata i le fa tausaga o tagofia ma su'esu'eina pea lenei mata'upu, peita'i e le'i maua lava se tali i le tagata na tupu i lea fa'alavelave ua maliu ai le alii o Tu'u'au Fa'asavalu.
Comments