Fa'atautō le ulua'i amepasa a le To'omaga mo e Puapuagatia(S.V.S.G.

Toleafoa Rev Father Larry Leatuao Tupa'i Lavea| Photographer: Oscar Mose.

Ulua'i taimi ua tōfia ai se amepasa o tamaiti mo le Samoa Victim Support.

O le uluai taimi lenei ua tōfia ai se tasi i le tofiga o le Amepasa mo tamaiti i le faalapotopotoga o le Toomaga mo ē puapuagatia.

O lea tofiga ua filifilia ai se tasi o tamālii ae o se faifeau foi mai Aukilani, le susuga ia Tole'afoa Rev Father Larry Leatuao Tupa'i Lavea.

O le sauniga faatautō sa faataunuuina i le asō i le Potu Faamasino o le Faamasinoga Sili a Samoa, ma sa faatautaia e le afioga i le Faamasino Sinia ia Vui Clarence Nelson.

O le afioga ia Toleafoa, o se faipisinisi ua loa lana tautua auauna e ala lea i le auina atu o fua o faatoaga, oloa e gaosi lava i Samoa ma meataulima i atunuu i fafo e pei o Niu Sila ma maua ai seleni a le atunuu.

Na auai le Taitaifono o le Komiti Faafoe a le Samoa Victim Support ia Maposua Tanya Toailoa, o le afioga ia Tuiātua Tupua Tamasese Efi ma le Masiofo, pa'aga totino a le faalapotopotoga aemaise o sui o aiga.

O le afioga ia Maposua, na fai ma sui o le komiti faafoe a le Toomaga e molimoli le lauga faafetai i le Amepasa fou a le faalapotopotoga, ona o le taliaina o lea tofiga tāua.

Na saunoa le susuga i le faafeagaiga e tali fuaitau i le faaaloalo ma le faaeaea a le Toomaga ma lana Komiti faafoe e galue ma tautua ai auā Samoa ma i latou o toomaga i lea nofoaga.