Fai atu Egelani i le RLWC: Aua le fa'asala ina Junior Paulo.

14 Novema 2022

Na ta’ita’ia e le faia'oga o Egelani, Shaun Wane, le vala'au mo le kapeteni a Samoa, Junior Paulo, ina ia aua ne’i fa’amalolo ma ia ta'alo i le sa'iliga siamupini a lona atunu’u i le Lakapi Liki o le Ipu a le Lalolagi.

Ua muta le avanoa a Enelagi mo le tausinioga a le Ipu o le Lalolagi o le Lakapi Liki o lenei tausaga 2022 ina ua fa'ato'ilalo e le Toa Samoa i le ta'aloga mo le Semi Final i le vaveao o le Aso Sa 13 Novema 2022, ae ua fa'aali se manatu o le ali'i faia'oga ta'iulu a Enelagi ia Shaun Wane i lona le mana'o ai e misi e le kapeteni o le Toa Samoa ia Junior Paulo le avanoa e ta'alo ai i le ta'aloga mo sa'iliga siamupini ma le 'au a Ausetalia.

O Junior Paulo na fa'asalaina i le pepa samasama 'ina ua faatino ina se pu'e soli tulafono fa'atasi ai ma le susuga ia Royse Hunt i le ali'i Enelagi o Tom Burgess, o lenei gaioga sa o la'ua lifi ai i luga Tom ma toe pa'u ane ai i lalo ma na fa'asalaina ai loa e le laufali i le pepa samasama mo le 10 minute.

E le'i avea le fa'asalaga o Paulo na fa'atamala ai Samoa i le latou finau ma manumalo ai ia Enelagi, ma na ta'ua e Wane ina ua mae'a le ta'aloga, e le toe mana'omia e le komiti e iloiloina le ta'aloga se isi faasalaga nai lo le fa'asalaga o le pepa samasama sa tu'uina iai.

"O le auala na faʻatautaia ai lenei Ipu a le Lalolagi 'e le laufali e mata'utia tele, na latou faʻatagaina lava tama ta'a'a e fa'aauau le ta'aloga," o le tala lea a Wane.

“Na ‘ou fiafia e le’i tulia o ia, o lo matou faia’ina i le a ta'aloga e leai se mea e fai i ai." o le fa'aaopopo lea a le faiaoga ulu a Enelagi i le fa'atalanoa ina ua mae'a le ta'aloga.

E le gata o le ali'i faiaoga a Enelagi, ae o le alii fo'i o Tom Burgess lea na si'i i luga e Paulo ma Hunt lea fo'i ua lagolagoina le manatu o le latou faia'oga ina ia tu'u pea le avanoa mo Paulo e ta'ita'i le Toa Samoa ma ta'alo ai ile Final ma Ausetalia.

FA'ALEAOGAINA LE ILOILOGA MO PAULO.

Ae ise tala lata mai o lea ua fa'aleaogaina ni su'esuega sa fa'atino mo le susuga ia Paulo ma olea ua maua ai lona avanoa e ta'alo ai ma ta'ita'i le Toa Samoa i le ta'aloga ma Ausetalia i le Aso 19 i le Ipu o le Lalolagi 2022.