21 Aukuso 2023: E lata i le $3000 tupe Samoa na gau i ni faiga taufa'avalea ma le gaoi i luga o Upega Tafa'ilagi a se tina mai i Nu'u Fou ua manatu e le fa'ailoaina lona suafa.
I le talanoaga a le Blutv ma le tina lenei 42 tausaga le matua, o le masina o Me o le tausaga lenei 2023 na maua ai le feso'ota'iga ma se tamaloa palagi e aumai i Amerika e fa'apea e iai sona so'otaga i Samoa.
O se fa'asalalauga sa fai i luga o le facebook, o ni avanoa faigaluega e ofoina atu mo tagata e galulue ai lea i se fale gaosi 'oloa i Amerika.
Sa muamua ona fa'atonuina le tina e lenei tama palagi, ina ia amata loa ona fa'agaioi a latou pepa ma lona to'alua ma ua maua fo'i le avanoa e mafai ona malaga fa'atasi atu ai ma si a la fanau e to'a 3.
Na amata ona lafo kopi o tusifolau i Amerika ma le tu'utu'uga e talosaga ai a latou VISA faigaluega, ina ua mavae le vaiaso muamua ae tapa mai le tagata lava lenei i ni la'ua fetusia'iga i le telefoni; ua mana'omia se seleni e $500 e lafoina atu e fa'amautuina ai a latou pepa.
E talu ai ona o le mana'o o le tina lenei, atonu o le manuia lava lenei mo ia ma le fanau sa le fa'atali ai lava ae ua lafo le seleni.
I le amataga o Iuni i le 15, na tu'utala ai ma le tama palagi lenei e tatau ona maua ai a latou VISA ma fa'amautinoa loa lea o a latou pepa malaga.
E o'o ane i le Aso lea sa faia ai le tu'ugatala, ae toe maua le isi tala ua mana'omia e le Pisinisi lea se isi tupe e fai ai lesitala a ia ma lona to'alua ina ia faigofie ona taunu'u atu loa amata loa ona faigaluega.
"Na vili mai le tamaloa i le aso a lena, faimai toe tasi a mea la e mana'o ai le kamupani o se isi tupe se'i fa'amautu ai ma avanoa ma lou koalua i le kamupani".
Sa toe taumafai ma lafo loa le $200 Amerika, ma peita'i sa toe fa'atali fo'i ina ua faimai e iai isi vaega e mana'omia.
O ina la sa mate'ia ai loa e lenei tina ina ua talanoa atu iai lona to'alua, se'i sa'ili pe e fa'amaonia ma sa'o nei mea. O le aso 21 o Iuni, na le toe talia ai loa e le ulugali'i lenei fe'au tusitusia a lea tagata ma sa'ili fesoasoani ai loa i le Ofisa o Psinisi ma Galuega, ma na fautuaina ai la'ua e taofi ona toe feso'ota'i pe toe talanoa ia lea tagata; ona o galuega uma fa'apenei e ui uma mai i le malo.
Saunoa le tina lenei, pe 'a tu'ufa'atasi se seleni sa fa'aaluina i lenei faiga e o'o atu lava i le $3000 tupe Samoa.
O nai tausaga e le'i mamao sa fautuaina ai fo'i e le Matagaluega o Pisinisi Alamanuia ma Leipa le atunu'u ona o le tele o fa'asalalauga taufa'avalea o lo'o fa'asalalauina i luga o Upega fa'amatalaga e ono avea ma tulaga e maileia ai seleni a le atunu'u.
Comments