Na siisii saunoaga ma felafolafoaiga i le maota fono i le fono lona tolu a le Palemene i lenei tausaga 2024, o loo talanoaina ai le paketi a le mālō ua folasia.
O le tasi o mataupu na lagā i le taeao nei e le faipule o Faleata 4 ia Ale Vena Ale, o le fesiligia o le tulaga ua oo iai le mataupu i le maliu o se alii aoga i le tausaga 2021 i Vaitele, o lea lava o loo talia suesuega a leoleo.
Na faauilavea le Minisita o leoleo ma tali aloaia e tusa o lea mataupu.
I le tali a le Minisita le afioga ia Faualo Harry Schuster, sa ia faailoa o lea ua uma ona fai le faaiuga a le Matagaluega o Leoleo, ma o le faaiuga a leoleo e lē mafai ona latou ave le matāupu i le faamasinoga e faasaga iai latou o masalomia ona e leo lava ni mau e faamautū ai moliaga ma mau.
Saunoa Faualo, e na te lagolagoina le faaiuga a leoleo, ona o le itū lea o loo iai i le taiala ma le tulafono o le faatinoga o galuega faatino a le Matāgaluega o leoleo.
Na saunoa foi le Minisita, afai ae iai ni isi e lë taliaina lea faaiuga a le Matāgaluega o Leoleo, o loo iai le avanoa e mafai ona agai sao le tagata e faaulu sana tagi i le faamasinoga(private prosecution) poo le faatino o se tagi faatulāfono(sue) e faasaga i le Matāgaluega o Leoleo.
Na feteenai le saunoaga lenei a le Minisita o Leoleo ma se manatu o le Minisita o le Matagaluega o Faatoaga ma Faigafaiva ia Laaulialemalietoa Polataivao Fosi Schmidt, e pei ona ia tulai ma faailoa lona foi lagona i lea mataupu ona o ia le isi tagata o loo aafia i tuuaiga sa fai e uiga i lenei Matāupu.
Ua faailoa foi Laauli, o le mataupu lenei o le a talanoa ai i le Kapeneta ona o lea ua tali faalauaitele Faualo i le Palemene ae e lei talanoaina i le Kapeneta.
Na toe tulai le Minisita o Leoleo ma saunoa, o lona lagolagoina o lea faaiuga a lana Matagaluega, ona o loo mulimulita'i lava leoleo i le tulāfono ma taiala o le faatinoga o le latou galuega.
Comments