Lagolagoina e Samoa le unā’ia pea o le fīlēmū ma le tausia o le nofo fealofani i le lalolagi.

Deputy Prime Minisiter Tuala Tevaga Ponifasio

O le vaiaso na te’a nei sa fa'atinoina ai se solo ma o'o atu ai i luma maota o le maota, o le solo e fa'tatau i le fa’afitauli o lo’o feagai nei ma Isaraelu ma Palesitina. I le saunoaga a le afioga i le Sui Palemia ia Tevaga Iosefo Poniasio, na ia fofola ai vaega uma ua mae'a ta'oto mo mataupu fa'avaomalo.

" E fa’ailoa atu ma le fa’aaloalo i le atun’uu, o tulaga fa’avāomālō i matā’upu fa’apenei ua mae’a ona fa’ata’oto, ma o matā’upu e ma’ale’ale itu uma. Aemaise o ni matā’upu e a’afia ai le saogālēmū o le lalolagi atoa o lo’o i lalo o le Fa’alapotopotoga o le Pulega o le Saogālēmū (Security Council) o Mālō Aufa’atasi".

Saunoa le sui Palemia, e matua lagolagoina lava e Samoa le tausisia o le saogalemu i le lalolagi ma o mata'upu lava fa'apenei iai lava ona aulape ua mae'a fa'ata'oto ma o lo'o maioio lelei.

"E lagolagoina e Samoa le unā’ia pea o le fīlēmū ma le tausia o le nofo fealofani i Mālō uma o le lalolagi e ala i le tausisia o Tulafono, Feagaiga, ma Faigāpa’aga Fa’avāomālō, ina ia tafi’esea vesiga ma taua i le lalolagi".

O lenei solo, sa mafai ona tuufa'atasi e nisi ma le fa'amoemoe ina ia momoli atu i le malo lo latou mana'oga ina saini i le feagaiga a malo aufa'atasi mo le tausiaina o le saogalemu aemaise o le fa'amauta ai o taua ma vevesi o lo'o feagai ma atunu'u tetele nei o le lalolagi.

"O le solo a nisi na o’o mai i le vaiaso na te’a nei, e le’i taofia e le Mālō.

O le fa’atinoga lea o lo latou aiātatau e tusa ma le fa’asinomaga o le Fa’avae. Sa i ai fo’i le avanoa e o’o mai ai Sui o lenei solo e momoli mai i le Ofisa nei le latou talosaga. Sa i ai fo’i Sui o le Ofisa na o’o atu i le vaega sa i ai i latou a’e le’i tāina le 10:00 i lea taeao e pei o le latou taimi na tu’uina mai. Peita’i, e taunu’u atu ua tu’umuli i latou to’aitiiti sa auai i le solo".

"E pei ona silafia e le pa’ia o le atunu’u, o lo’o fa’aauau pea lenei matāupu e o’o mai i le asō, ma o lo’o fa’agaioi fo’i galuega a le United Nations Security Council e sa’ili fofō i lenei matā’upu. Ma e fa’aauau pea ona auai Samoa e fa’atino ona tiute i Mālō Aufa’atasi, e tusa ma tulafono ma Feagaiga Fa’avāomālō o lo’o limata’ita’ina ai fa’atinoga a Mālō uma o lo’o i le li’o o Mālō Aufa’atasi".