Leiloa po'o fea se malae o lea fai ai le ta'amilosaga liki aua ua tapunia le malae a ST Joseph's college.

O le ta'amilosaga o le lakapi liki i totonu o Samoa o se tasi o ta'amilosaga ua lauiloa ma e tulituli mata'i e le toatele o atunu'u aemaise ai o le au tapuai ma le au lagolago a kalapu ese'ese i totonu o Samoa e pei ona iai 'au i totonu o le taulaga fa'apea ai kalapu liki mai nu'u ma itumalo i tua.

O le malae a le kolisi o Sagato Iosefo o se tasi nei o malae tele ina taula'i iai le fa'agasologa ma le fa'atinoina o le tele o ta'amilosaga lakapi i totonu o Samoa e pei ona iai nisi o ta'amilosaga ta'ito'a fitu, lakapi 15 a aoga fa'apea ai ma le ta'amilosaga lakapi liki e pei ona masani ai tausaga ta'itasi.

O le tulaga i le lava o le avanoa mo le pakaina o ta'avale fa'apea le lava o malae e tolu e mafai ona fa'atino ai ta'aloga e tolu i le taimi e tasi e le gata i lea o lo'o iai lava le fale Samoa tele e mafai ona fa'amautu ai komiti ma pulega o ta'amilosaga ta'itasi e fuafua o le 'a fa'aaogaina le malae o le kolisi i Alafua.

O le aveesea ai o le kolisi o Sagato Iosefo mai i ta'aloga a kolisi maualuluga uma o Samoa e tusa ma le fa'asalaga sa tu'uina ai e 4 tausaga, o le ala fo'i lea o le le toe taliaina e le kolisi o so'o se ta'aloga ma so'o se ta'amilosaga e fuafua e fa'aaogaina le malae i Alafau mo fa'amoemoega.

O le ala fo'i lea o le tolopoina ai o le fa'atinoina o le ta'amilosaga lakapi liki a Samoa lea sa fuafua e amatalia i le vaiaso ua mavae talu ai o lea e le'i ma'oti mai se fa'atanaga mai le puleaoga male kolisi o Sagato Iosefo i Alafua e tatalaina le malae ma fa'aaogaina mo ta'aloga lakapi ua uma ona fuafuaina e tatau ona fa'atino.

O le tulaga e pei ona iai le malae ta'alo fa'avaomalo a le atunu'u le Apia Park e na'o le tasi le malae e tasi fo'i le ta'aloga e mafai ona fa'atinoina ai, ma ua uma ona fa'atulaga fa'amoemoega e fa'aaogaina ai le Apia Park e pei ona iai le ta'amilosaga ta'ito'a fitu a le Iuni Lakapi le itumalo o Faleata lea o le a fa'atinoina i le aso To'onai o le vaiaso lenei aso 1 o le masina o Iuni 2024.

O le taimi nei o lo'o galulue le pulega a le lakapi Liki a Samoa i le tau sailia o se malae ma se nofoaga e avanoa e mafai ona fa'ataunu'uina i se taimi vave ta'amilosaga liki a kalapu ese'ese i totonu o Samoa.