Lesitala i upega tafa'ilagi, malaga mai i Samoa e lolomi tama'i lima(fingerprints) ma pu'e le ata, ona toe totogi lea o le pasese e malaga mai ai e palota i le taimi o le Palota Tele.

Ua pasia ma 'ua aloa'ia nei le teuteuga o le tulafono o Faigapalota 2024 sa taufa'aofi i le vaiaso na te'a i le fono a le Palemene o Samoa.

O lea teuteuga ua fa'aogaina ai le fa'ava'a fou(new system) e ala lea i le lesitalaina o tagata Samoa sitiseni o lo'o alala ma nonofo i atunu'u i fafo e iai le fa'amoemoe e fia palota mai mo faigapalota a Samoa e sa'ilia ai ni ona ta'ita'i.

Ma ua fa'agaioi nei lea faiga fou, o lo'o nafa tonu lea ma le Komesina o faiga Palota ma lana aufaigaluega, e tatau ona fa'aaogaina lea faiga fou i le faigapalota tele o loma nei i le tausaga 2026.

E lua ni vaega taua sa teuteuina mai i le Tulafono o Faiga Paltoa 2019, e aofia ai le euteuga o le vaega #13, ina ia fa'ataua ai le galuega lesitala e fa'aaoga ai 'upega o fa'amatalaga(online portal), aemaise o le avanoa ai o lea 'au'aunaga mo so'o se tagatanuu Samoa i Samoa nei ma le lalolagi atoa, o i latou o lo'o fia lesitala aua le faigapalota i le palota tele o le 2026.

I le tulafono o faigapalota 2019, o lo'o manino ai maioio ua na'o tagatanuu Samoa lava o lo'o galulue i glueg fa'avaitaimi ma fanau aoga e mafai ona lesitala, ae peita'i o lea ua tatala le avanoa mo so'o se tagatanuu Samoa lava o lo'o nonofo i atununuu i fafo.

O le isi teuteuga, ua teuteuina ai le vaega lona 23 o le Tulafono o Faiga Palota 2024, o lea ua mafai nei e le Komesina ma le Ofisa o Faiga Palota, ona fa'atino lo latou tiute mo le toe faia lea o lesitala atoa o lola palota o itumalo e 51 a le atunuu.

O nei teuteuga, e tatala lava le avanoa mo se tagatanuu Samoa i atunuu i fafo e fai ai a latou lesitala i luga o le Upega Tafa'ilagi a le O.E.C, ae peita'i e le mafai lava ona agava'a le igoa i se lola palota se'i vagana ua malaga mai i Samoa e fa'atino lelolomiina o tamatama'ilima(fingerprints) ma le pu'e o le ata o foliga.

A mae'a ona fa'atinoa uma vaega nei, o le 'a mafai loa ona tu'u le igoa o lea tagata i totonu o lola palota.

O le isi itu sa afea i le saunoaga fa'amalamalama a le afioga i le Minisita o le Komisi o le Komesina o Palota, mo i latou e ta'ilua a latou Sitiseni(dual citizens), e pule lava le tagata ia i lona faitalia e fia palota ai mo Samoa po'o le palota lava fo'i i le atunuu o lo'o alala ma nofo ai.

E le'i faigofie le lauliliuina o lea tulafono taufa'aofi, e pei ona fa'aalia i finagalo o faipule o le palemene.

Ae e ui i lea sa lilifa lava i le lagolagoina ae na iai lava fo'i ma atugaluga na fa'aalia ona o lea faiga e fou, ma sa le'i faia muamua i Samoa.

E 18 masina ua fa'ailoa e le Komesina o Faiga Palota ia Tuiafelolo Alexandra John Stanley, o le 'a galulue ai lana aufaigaluega ma i latou ua iai le tomai fa'apitoa e tapena ai le fa'ava'a fou(new system) ina ia fetaui lelei ma le faigapalota o loma nei i le 2026.

Afai ae fa'amalieina uma vaega ta'itasi mo le lesitala, e tatau fo'i ona malaga mai i Samoa e fa'atino ai lau palota i taimi o le faigapalota tele a le atunuu.