I le atoa ai o le vaiaso talu ona pale le tamaitai o Moemoana Safaatoa Schwenke e avea ma lalelei poo Miss Samoa 2023-2024, o le taeao nei ua momoli aloaia atu ai e le faalapotopotoga sa nafa ma le tapenaina o lenei faamoemoe le Onomea Production i le Ofisa o Turisi e faatinoa ai ona tiute faatausala o Samoa.
O le afioga i le taitaofono ia Leituala Toelupe Tago sa saunoa i le saunoaga autū e momoli le faafetai i le atunuu ae o lagolago foi a paaga pisinisi ma kamupanī aemaise o le mālō i le faataunuuina lea o lenei faamoemoe.
O le taualuga o le saunoaga na momoli aloaia ai loa Moemoana i le Ofisa o Turisi ina ia faatino ai ana galuega ma lana tautua ia Samoa.
O Moemoana o se tamaitai 26 tausaga le matua ma o se alo e faasino i se tasi foi o tamaitai sa taiaveina le pale lenei o le Miss Samoa ia Maryjane.
O galuega a le Miss Samoa, e faalauiloa le atunuu i le lalolagi e galulue faapaga ai ma le Samoa Tourism Authority ma le fai ma sui o le mālō e faafeiloai ni mālō faaaloalogia.
I nei tausaga atoa, o le 'ā aumau ai Moemoana i Samoa nei e faatino ana galuega aemaise o le tapenaga lea mo le tausala o le Pasefika i le masina o Fepuari i le tausaga fou 2024.
Comments