30 Novema 2022.
O le vaiaso lenei na amataina ai le fa'amoemoe mo le 16 aso o le fa'ama'ite lea o le fa'atalanoaina o auala ma saili fofo o fa'afitauli o lo'o a'afia ai lotoifale o 'aiga ona o Sauaga e fa'asaga i tina ma fanau tama'ita'i.
I le taeao o le Aso Gafua na tatalaina ai le nei fa'amoemoe e pei lea ona ta'imua ai le Matagaluega o Tina ma Tama'itai.
Na amata i se savali sa 'auai uma ai matagaluega esee'se a le tatou malo, o le fa'ailoga o le tutu fa'atasi ina ia tineia nei sauaga o loo a'afia ai tina ma tama'ita'i ma fanau.
I lea sauniga na lauga ai le afioga i le ali'i Minisita o le Matagaluega o Tina ma Tamaitai ia Leota Laki Lamositele e tatala le fa'amoemoe mo fa'alauiloa ma le finauina o mata'upu aua ni fofo o faa'fitauli tau i sauaga.
I le lauga a le afioga i le alii Minisita na mafuli lava i galuega fa'atinoa a tagata uma aemaise o lotifale fa'a le 'aiga e pei o matua ma fanau aemaise o ulugalii.
"O le anofale atoa o lenei faamoemoe, o le taumafai lea e avea Samoa ma se atunuu e saoloto mai sauaga o tina ma tamaitai faapea fanau I totonu o aiga. E lē na ma le laina le sasao faafi ma le sosolo faafa’amai o lenei faafitauli I totonu o lo tatou atunuu ma ua tonu ai le tofa I le malo e tauala atu I le Matagaluega o Tina ma Tamaitai, Atina’e o Nuu ma Agafessotai, e amatamea i le faamaite taua lenei ina ia fesoasoani ai ile itupa o alii, e foia lenei faafitauli mataga.
O le suesuega o le “Saogalemu o Aiga” 2000 sa faamauina ai 46% le aofai o tina na sauaina e o latou taitoalua I le taimi atoa o le mafutaga faaleulugalii. Na toe faia lenei suesuega ile 2017 ma faamauina ai ua 60% le aofai o tina na sauaina e o latou taitoalua I le taimi atoa o le mafutaga faaleulugalii. O lona uiga, e 14% na siitia ai lea fainumela I totonu ole 17 tausaga ma ose siitaga ua maoa’e. Sa faamauina ai foi ile suesuega lea ile 2017 le tusa male 90% ole fanau na sauaina. O lona uiga afai e to’a 3 pe to’a 5 se fanau iti ile aiga e aafia uma lava latou I taimi uma e faatino ai lenei aga le alofa I totonu o lea aiga. E foliga mai a toe fai se isi suesuega e ono toe faailoa mai ai e faaauau pea le alu I luga o nei fainumela.
E talitonu sa tele taumafaiga e auala i polokalame eseese na faatinoina e le tatou malo ma ana paaga, e taumafai e foia ai lenei to’atuga ae paga lea e le o faaitiitia lava le faatupulaia. Ua fia foi tausaga o fai lenei polokalame 16 aso e saga faamalosia ai lava auala e taofia ai lenei faama’I ae leai lava. E lata ile miliona tala ile tausaga tupe faaalu a paaga ma le tatou malo e alu ai I nei taumafaiga ae le o fua mai ise tulaga e tatau ona iai. Oute manatu ua tatau ona fai se isi faiga e ese mai ile lagiina o pese, tauvaga tauloto, tala tusitusia, ata tifaga, faiga lotu, mea taumafa, semina, fonotaga, soalaupule, taavale teuteu, ia ma lanu o laei sa faaaoga le lanu piniki, ia o lea ua laei uliuli, "
O se tulaga sa fesiligia ai e le afioga i Minisita latou o lo'o fai ma mausa le faia o nei sauaga ma aafia ai pea tina ma tamaitai.
"Samoa, O fea ea lau aganuu oloo tatou alalaga ai nei e ola ma oti le tama e puipui lana feagaiga? O fea ea lou faavae Samoa e faavae I le Atua? O le Samoa ea lea na mamanu mai e o tatou matua ua lagomau mai atutia e tatou te soifua ma ola ai? Ae o ai le tagata e fiamalosi ma fiasili ma faaoo sauaga ae oo I le Atua e ana le tagata na te le mafai ona faia lea mea? Aisea ua manatu ai oe le tama ma le tane poo ai lava, o lou faatinoga o nei amioga ma nei sauaga e te tauleleia ma e toa ai? O le a ea le aoga e na’o na o ai I le lotu ma alalaga I viiga o le Atua ae amio pa’aa ma amio mataga faapea? "
Na fa'aiu le saunoaga a le Minisita i se fautuaga ma se tuualalo i tama tane uma o Samoa ina ia toe mafaufau ma toe niofo i lalo a'o le'i faia fa'aiuga ma fa'atino nei ituaiga o sauaga.
"Ao tatou tatala aloaia lenei polokalama faatino mo le 16 aso e uunaia ai le tetee atu I sauaga o soo se aga, oute tuualalo atu i tama tane uma o Samoa oloo toilalo popo I lenei uiga maualalo ina ia o tatou tulai mai ma fai se suiga. Ia manatua o tatou o le mailei a le tiapolo ae o le mau a le poto; A ita ia e nofo I lalo ma mafaufau. O le uta a le vale e ta mau I le mea ua ia manatu iai ae o le uta a le atamai e fetuunai ma toe mafaufau lelei pe oa taunuuga o lau sauaga lea o le a fai.
O le toa moni lena oloo faamatala mai e le Tusi Paia; o le toa e na te iloa pulea ma faafoe lona loto ae le’o le fetau’ailoto. Fai sou sao ma so’u sao I le fofoina o lenei gasegase ua sasao fa’aafi. Tama e o Samoa Ia malu I fale tamaitai ia outou ia malu I fale tatou fanau ia outou, ia malu I fale lou aiga ia te oe. Ia alofa mai le Atua silisili ese ia te oe ma a’u ia malu le tatou lotoifale ina ia maua ai e samoa se atunuu toafilemu ao tatou folau ma le faatuatua. "
O le sini autu ma fe'au taumolimoli ua fa'a autu ina ai lenei aso o le "MALU I FALE"
Comments