Tūsia e Lauano Demetrius Ah Mau.
O le aso 10 o le masina o Aperila o le 'ā tatala aloa'ia ai le ta’amilosaga o le World Rugby Pacific Challenge, lea e tali mālō ai Samoa. E lua vaiaso lea e fa'agasolo ai lenei ta’amilosaga e amata mai i le aso 10 agai i le aso 20 o Mati, e 4 ‘au o le a tausinio i lea taamilosaga e aofia ai le ‘au a Fiti o Toga, Japan XV fa’apea ai ma le Manuma.
O le faamoemoe o lenei ta’amilosaga e mo le sailia ai o alii taaalo mai le Pasefika, e faauluina atu ini polokalame o le atinaeina o le lakapi ma maua ai ni a latou avanoa faakonakarate i kalapu lakapī i atunuu i fafo auā lo latou lumana'i manuia.
O aiaiga mo 'au nei e 4 o le 'ā tauvā, e tatau ona i luga ole 23 tausaga le matutua o alii ta'a'alo e to’a 28 ae o leisi to’alima e tatau ona ova atu male 18 tausaga le matutua.
O ‘au uma foi e tatau ona ta’i tolu taaloga a le ‘au e tasi, ma o le ‘au lava e uma ane le faagasologa o le ta’amilosaga o loo sili a latou togi(points) i le aotelega o togi tuufatasi mo 'au nei e 4, o le 'au lena o le 'a avea ma siamupini mo lea taamilosaga.
O le 'au a Fiti lea sa manumālō ma siamupini ai i le ta'amilosaga o le tausaga ua tuana’i.
O lenei taamilosaga ua mafai ona faataunuuina ona o le faigā pā'aga a le Iuni Lakapi a le Lalolagi(World Rugby) ma le Lakapi Samoa.
Na tā'ua e le ofisa sili o le Lakapi Samoa le Afioga ia Faleomavaega Vincent Fepuleai i se pepa o faamagalaga, le agaga fiafia o le Lakapi Samoa e tali mālō mo lenei taamilosaga, ma na tā'ua foi ua talafeauga lelei le faia mai i ele'ele o Sāmoa o lenei taamilosaga ma faamanatu faatasi ai le 'atoaga o le 100 tausaga o le tautua ma le sao tāua o le Lakapī Samoa e ala i le atina'eina ma le fa'afaileleina o le taleni lakapi i totonu o Samoa.
Comments