O lo'o fa'atali le taunu'uga o le fono talu ai o le 'Atoa o Samoa i le aso 11 o Oketopa 2023.

Ata Pu'eina: Government of Samoa.

Ua fa'ailoa e le Ofisa o le Kovana a Amerika Samoa, o lo'o talia pea i le taimi lenei le taunu'uga o le fono talu ai o Samoa e lua le Atoa o Samoa, lea na fa'ataunu'uina i le aso 11 o Oketopa o le tausaga nei 2023 i le faletalimalo o le Taumeasina.

O le fono lona fa(4) lenei a le Atoa o Samoa, ma o mata'upu na talanoaina e aofia ai avanoa mo pisinisi i fefa'ataua'iga i Samoa e lua, o tulaga tau i le soifua maloloina, 'au'aunaga o femalagaina, Pemita ma VISA, ma isi mata'upu talafeagai aua tagatanu'u o Samoa e lua.

Ua fa'ailoa e se tasi o sui sinia o le Ofisa o le Kovana Sili le susuga ia Loa Tuimavave Tauapa'i Laupola, o lo'o talia se iloiloga a le afioga i le Kovana Sili o Amerika Samoa i mata'upu e pei ona fa'ailoa e le Palemia o Samoa ma o le 'a maua ai se taunu'uga ua malilie ai atunu'u e lua.

O nei fonotaga na fa'ailoa e le sui o le Ofisa o le Kovana Sili, ua mae'a ona amana'ia lelei e le faigamalo o Amerika Samoa, aemaise o tulaga i mata'upu tau i le puipuiga fa'alotoifale, fefa'ataua'iga, soifua maloloina, fa'asao o puna'oa ma le si'osi'omaga ma faigafaiva i gataifale.

O le isi fonotaga o le 'a talimalo ai Amerika Samoa, e fa'atalanoa ai taualumaga o mata'upu fa'aauau mo Samoa e lua.

E le'i mautu ni fa'amatalaga auiliili o fonotaga ua mae'a, i se tulaga ua to'a iai feutana'iga ma soalaupulega.