31 Ianuari 2023.
Ua saunoa manino le afioga i le ta'ita'i o le Itu Agai i totonu o le Palemene ia Fonotoe Piere Lauofo i sana fa'atalanoaga ma le nusipepa o le Newsline e fa'amanino ni isi o vala e uiga i le mata'upu lea ua tofia ai nei o ia e fai ma Ta'ita'i o le Itu Agai i totonu o le Palemene.
O le vaiaso ua tuana'i na taunu'u ai luma o le laulauafono a le fono faitulafono a Samoa le lipoti a le Komiti mo faiga palota, faiga fa'alefa'avae ma Tulafono Tumau a le maota na fai ai fo'i ni felafolafoa'iga a sui o le maota ma taualuga ai le pasiaina ai i le avea o Fonotoe ma ta'ita'i.
O le mata'upu na fa'aali ai foi le tele o finagalo, ae pei ta'i ua saunoa Lauofo; o le tofiga lenei ua na'o totonu lava o le Palemene e fa'aaogaina ai ae o tofiga lava ia a le HRPP o lo'o tumau pea ana tofiga i le Ta'ita'i o lo'o iai le susuga ia Tuila'epa Sailele Malielegaoi, ae o ia o lo'o sui ta'ita'i e fa'apena fo'i i le tofiga o le failautusi.
Na ta'ua foi e le afioga ia Fonotoe, o le taimi nei o lo'o maopoopo lava ma fealofani le vaega fa'aupufai a le HRPP.
I le teuteuga o le tulafono tumau a le maota o lo'o aiaia ai le le toe iai lea o se avanoa e fa'aali ai manatu o sui ua fa'amaloloina le tumau, e aofia ai le taofia ona toe solia e sui ua fa'amalolo le tumau o le nofoaga a le palemene, e le mafai ai fo'i ona toe tusi ma fa'aali ni manatu aga'i i le Fofoga Fetalai.
I lalo lava o nei tu'utu'uga, afai ae soli e ni sui faipule ua fa'amalolo le tumau; o le 'a mafai ai loa ona toe fa'aopoopo le umi o le fa'asalaga.
Comments