Pine auro Marvin & Leon Soonalole ma Tai Prichard i le Ipu o le Pasefika o le Tenisi.

Marvin ma Leon Soonalole | Oceania Tennis

Ua taualuga le ta'amilosaga Tenisi o le itūlagi lenei o le Pasefika(Pacific Nations Cup) i le afiafi o le Aso Toona'i lea na talimālō ai Samoa sa faia i le malae tenisi i le Apia Park.

O le Aso Sā o le vaiaso na te'a na tatalaina ai lenei taamilosaga ma amatalia ai le taamilosaga i le Aso Gafua 11 Setema 2023.

E 10 'au a alii ma 'au a tamaitai e 8 na tausiniō i lea taamilosaga tele.

I le talanoaga ma le sui o le Asosi Tenisi ia Sulā Denks Soonalole i lenei vaiaso, sa ia faaalia ai le tāua o le talimālō ai o Samoa i le taamilosaga lenei poo le ipu o le Pasefika i tapenaga mo isi faamoemoe tetele e pei o taaloga a le Pasefika i le Aso 19 o Novema lea e talimālō ai Solomona.

E le gata i lea ae sa saunoa Sulā, o le isi itū tāua o nei taamilosaga e faigofie ai ona saili avanoa o fanau lāiti(juniors) e fa'asee atu ai i le isi la'asaga ma mafai ai ona taaalo i vaega feoloolo poo vaega matutua.

I lenei taamilosaga, sa maitauina ai le finau o 'au mai atunuu o le Pasefika sa auai ma e faapena foi i le 'au tenisi a Samoa.

Na maua le avanoa e talanoa ai i se tasi o sui tuai o le Tenisi i Samoa le susuga ia Marvin Soonalole, ma na ia faailoa ai lona naunautaiga ina ia lelei se tulaga o Samoa i le ipu nei o le Pasefika.

O le itū tāua na faailoa e Marvin, o le avea ai o Samoa ma atunuu lelei le atinae ma le agai i luma o le taaloga tenisi pe afai e lelei ni tulaga ma le taunuuga o taaloga.

O Marvin ua 4 iai nei Ipu o le Pasefika ua taalo ai ma o lona faamoemoe ina ia avea o ia ma se faamalosi'au i ni isi o fanau o loo taumafai mai i leneu taaloga i Samoa ma le Pasefika.

I le taunuuga o le Sailiga siamupini o le Ipu o le Pasefika i le Aso Toonai, sa maitauina Ie finau o le au a Samoa aemaise o le 'au a alii lea na taaalo ai le au uso o Marvin Soonalole ma lona uso matua o Leon So'onalole aemaise o Tai Prichard i le vaega matutua i le Doubles i le taaloga finau ma le 'au mai Tahiti.

O le sailiga siamupini i le afiafi nei lea ua manuia ai taumafaiga a le 'au Samoa ia Marvin ma Leon ma ua maua ai e Samoa le Pine Auro o le vaega lea matutua mo le Doubles.

O le isi laasaga ua tapena ai le au a Samoa o tapenaga mo le Taaloga o le Pasefika i Solomona i le Masina o Novema o le tausaga nei.