Sa'ili tupe le Lakapi Liki Samoa mo le Toa Samoa.

15 Tesema 2022.

Su'a Fa'afouina Su'a (Peresitene o le Lakapi Liki)

Ua fa'atalosagaina nei e le pulega o le Lakapi Liki a Samoa le mamalu o le atunu'u mo se fesoasoani i le tatou ‘au o le Toa Samoa lea ua fa'amoemoe e malaga mai i Samoa i le aso 27 o Tesema 2022 ina ua mae'a ai le Ipu o le Lalolagi lea na 'ausia ai le tulaga maualuga i le sailiga siamupini.

O le feiloa'iga a le au tusitala Samoa ma le afioga i le Peresetene o le Lakapi Liki a Samoa le afioga ia Su'a Fa'afouina Su'a na fa'ailoa ai lea fa'amoemoe i le nei vaiaso.

E tusa ai ma le saunoaga a le afioga ia Su'a, o lea ua tapena le lakapi liki Samoa mo le fa'atinoina lea o se sailiga tupe TV ma le Leitiofoni i le Aso 17 o Tesema 2022 i Upolu e fa'apena ai fo'i ma le motu tele o Savai'i.

Ua fa'amaonia fo'i e le afioga ia Su'a, le fesoasoani ale malo o Samoa o le 'ā latou fa'amatu'u mai ai se seleni tele e lagolago ai lea fa'amoemoe mo le Toa Samoa, peita'i e le'i fa'ailoa mai e le afioga i le Peresetene po'o lea se aofa'i o le seleni o le 'ā mā'au iai le tatou mālō.

O le fa'amoemoe sa'ili tupe lenei e le'o iai se aofa'i fa'atapula'aina o silasila iai le pulega ae o le fa'amuamua lava o le tau lea o le malaga mo tama ta'aalo.

Ina ua fesiligia le afioga i le Peresetene i se tupe fa'ata'ita'i o lo'o silasila iai le pulega e tatau ona aoina mai, sa ia tā'ua o lo'o silasila i le $1.2 miliona tala ina ia mafai ona kava uma ai vaega o lea ua fa'ata'oto mo le malaga mai a le Toa Samoa.

O le Aso Lua 27 o Tesema i le afiafi e taunu'u mai ai le Toa Samoa ona feiloa'i ai le ma le mālō i le aso e soso'o ai.

O le fa'amoemoe mo solo a tagata o le atunu'u o le'a fa'ataunu'uina lea i le Aso 29 Tesema 2022 i le Apia Park ma e iai le fa’amoemoe e ono iai ni suiga e fua lea i polokalame a tama.