Saunoaga faʻapitoa mai le Afioga i le Sui Palemia: Tuala Tevaga Iosefo Ponifasio.

Full transcript press Statement - Government of Samoa

SAUNOAGA FA’APITOA MAI LE AFIOGA I LE SUI PALEMIA: TUALA TEVAGA IOSEFO PONIFASIO.

Aso Faraile, 22 Setema 2023.

Ae ou te le’i so’aia le Lualoto o le Itutolu o Sagaga, Sagaga i Palalaua, Sagaga i le Vaimauga ma Sagaga i Leusoga, Faleono o Leatigaga, o Faleata ma le gafa. Ou te mua’i fa’apoipoi lili’a fa’aalofisā o Tupe nai le malae o Vavau, ma ou fa’apea ane – papae ia i paga ti’a o le tauti’aga, e faigatā oe Samoa o le Ao Mamala.

O pa’ia fa’a-le-talalelei, pa’ia fa’a-le-mālō ma pa’ia fa’a-le-atunu’u, o le a ou le o’o i ai, auā e ta’oto a’o se ala o’o. E leai se tautai e toe fagota sagolegole i ai auā o Samoa o le atunu’u tofi, o le lā’au fo’i ua mae’a tofī tofā.

O le taeao nei na feiloa’i ai le Kapeneta i lana fonotaga fa’apitoa, ona o se matā’upu o lo’o feagai pea ma le Matāgaluega o Leoleo, ma o lo’o tālia pea e le mamalu o le atunu’u, se tali mai a Leoleo i le tulaga ua o’o i ai la latou su’esu’ega.

O le matā’upu lenei o se fa’alavelave na tula’i mai i le po o le Aso 21 Aperila 2021 i Vaitele i se taimi o le vaveao, na lavea ai se tama talavou e igoa iā Tu’uau i luga o le auala tele, lea e tā’ua o Ma’ali Street, ina ua so’a e se ta’avale afi ma maliu ai.

O lea matā’upu o lo’o tuliloaina pea e le mamalu o le atunu’u, ona o le tulaga maoa’e o le maliu ai o se tagata, ae ua silia ma le lua tausaga, e le’i mafai ona tu’uina mai e Leoleo se fa’amatalaga i se tulaga aloā’ia ua o’o i ai a latou su’esu’ega, pe fa’afefea fo’i ona tupu lenei fa’alavelave, a’o ai fo’i ua masalomia na tupu ai lenei fa’alavelave, ua mafua ai le maliu o Tu’uau.

O le mafua’aga lea ua lē nofonofo a’i ai lo tatou Mālō, ona e va’ai lo tatou Mālō i le aoao tetele o matā’upu fa’apenei, ua a’afia ai le fa’atinoga o tiute ma galuega o lo’o tau’ave e lea Matāgaluega ma lea Matāgaluega. A fai loa e fesiligia e le atunu’u le fa’amaoni o le auaunaga a so’o se itu tino o le Mālō, e ao ma tatau ona sa’ili le Mālō i ala o le Tulafono e fesoasoani ai i se matā’upu ua tula’i mai. A’o fea o tula’i mai ai, o ai ua a’afia ai, aisea ua to’a ai se matā’upu, aemaise se fa’aletonu o se auaunaga pe a a’afia le atunu’u.

O lenei matā’upu, e lagona ai lava le fa’anoanoa ma le manatu alofa ina ua tula’i mai. Ua le gata o se fa’alavelave ua maliu ai se tagata, ae ua silia ma le 2 tausaga e le’i maua lava se fa’amatalaga maumaututū mo i latou o lo’o nofo mafatia pea ona o se tasi e pele ua to’esea.

Matou te avatu ai fa’amaisega i le tinā, tamā, uso ma tuafafine o Tu’uau aemaise le ‘āiga atoa. Ia tumau pea le fa’amafanafanaga a le Agaga Pa’ia o le Atua i ō outou finagalo, e fa’amalosia ai pea lo outou fa’atuatua iā te Ia.

Ae le’i faia le fonotaga fa’apitoa a le Kapeneta i le taeao nei, sa maua se feiloā’iga a a’u nei ma le Komesina o le Matāgaluega o Leoleo, le afioga iā Au’apa’au Logoitino Filipo i le amataga o lenei vaiaso, se’i fa’ailoa mai le tulaga ua o’o i ai le su’esu’ega a leoleo. Sa fa’apenā ona tu’uina mai se fa’amatalaga aloā’ia a leoleo e tusa ma le la’asaga ua o’o i ai la latou su’esu’ega.

Fa’ailoa manino e le afioga i le Komesina o le Matāgaluega o Leoleo, o lo’o fa’aauau pea su’esu’ega a leoleo e le’o taofia. Ua mae’a ona latou su’esu’eina ma fa’atalanoa uma molimau tusitusia sa tu’uina atu e i latou sa tusia fa’amatalaga, peita’i e le’o mafai ona fa’amaoniaina.

Ia manino i le nofo silafia a le atunu’u, o le Matāgaluega a Leoleo, e gafa i latou ma le to’a fīlēmū o se atunu’u, fa’amamalu ma fa’atino le fa’amalosia o tulafono, puipui le saogālēmū o tagatānu’u ina ia malu tagata, ma ā latou meatotino, su’esu’e matā’upu o ni faiga fa’asolitulafono, ma molia i latou ma tu’uina atu i le Fa’amasinoga, pe afai ua i ai se masalosaloga tatau ua latou solia le Tulafono.

O lona uiga e tatau ona lava tapena molimau, ma mau a leoleo i le atoatoa, talafeagai, mausalī, malosi, ma lo latou talitonuga e aunoa ma se masalosaloga, a’o le’i tu’uina atu se tasi ua molia i ‘ā’ao o le Fa’amasinoga.

E tuto’atasi fo’i leoleo i le fa’atinoga o ā latou galuega ma su’esue’ga e tusa ai ma Tulafono o lo’o faatino ai o latou tiute sa fa’atautō ai i latou. Ae peita’i, o le naunauta’iga o le Mālō, ia mamao ‘ese lagona po’o se va’aiga lautele e fa’apea ua ‘a’apa atu le Mālō e fai galuega a Leoleo.

Ia ‘aua ne’i a’afia tulaga fa’apolokiki i le sā’ilia o le amiotonu i nei su’esu’ega. O Leoleo latou te fofogaina le atunu’u i tauālumaga uma o su’esu’ega i se tulaga manino aemaise o fa’alavelave tugā e pei o lenei matāupu, vaganā ai, ua tapu e le Tulafono ona o ni puipuiga o se tagata po’o se matā’upu i lalo o le Tulafono ona o aiātatau a tagata po’o le puipui fo’i i ni molimau ma ni fa’amatalaga e ono a’afia ma fa’aletonu ai se su’esu’ega o lo’o faia.

Ui o lea, e ao ona taumafai pea Leoleo e tali atu i le atunu’u i le tu’uina atu o fa’amatalaga e fesoasoani ai i le lagona popole ma le lē mautonu po’o le fa’anoanoa fo’i, ina ia maua pea e ‘āiga mafatia le mafanafana i le galuega fai a Leoleo, ina ia latou iloa le tonu ma se i’uga lelei mo e o lo’o fia maua se to’omaga.

Ua manatu le Mālō, e lē tatau ona to’a le su’esu’ega aemaise ua tele le taimi ua alu. Ua tu’uina atu ai nei e le Kapeneta i le Loia Sili, ina ia tapena mai se fautuaga mo le Kapeneta i se taimi vave e fa’asino tonu lava i le matā’upu lenei mo le aga’i i luma, e aofia ai vaega nei:

1. Le vave iloiloina o le faila, mau ma fa’amaumauga uma o lenei su’esu’ega o lo’o i Leoleo i le taimi nei ma tu’uina mai se fautuaga manino i le Kapeneta i le tulaga tonu ua o’o i ai lenei matā’upu. (Urgent assessment of the evidence / File).

2. Le silasila i le talafeagai lea o le fa’atūina o se Vaega Fa’apitoa o Leoleo mai Fafo (overseas) latou te tau’aveina le su’esu’ega e fa’apitoa i lenei matā’upu ma isi matā’upu e a’afia i lalo o lenei fa’alavelave.

3. O lenei faiga, o le a lē a’afia ai tofiga ua i ai a le Matāgaluega a Leoleo ae o le a patino lava i le su’esu’ega o le matā’upu lenei.

4. O le a fa’aauau pea le lē auai o le afioga i le Minisitā o le Matāgaluega o Leoleo, Falepuipui ma le Ola Toe Fuatā’ina, i lenei matā’upu ona ua ia fa’ailoa manino le i ai o lona pi’itaga i lē o lo’o masalomia na tupu ai lenei fa’alavelave.

5. Se fautuaga mo le puipuia o molimau o lo’o fia fesoasoani mai i lenei su’esu’ega.

6. Ia fa’atino pea auaunaga masani a Leoleo mo le atunu’u i lalo o le va’aiga a le afioga i le Komesina ma le Pulega o lo’o i ai nei fa’apea le afioga i le Minisitā iā Faualo Harry Shuster.

7. Se puipuiga i afioga a Minisitā o lo’o a’afia i le folafolaga tau fa’amata’u i ō la soifua o lo’o tā’ua e se tasi o molimau o lo’o a’afia i lalo o lenei su’esu’ega.

E tatalo atu i le tatou Mālō, ia maua pea le to’a fīmālie i finagalo o le atunu’u, a ia fesoasoani mai i lenei su’esu’ega, e ala i le tu’uina mai i le Vaega Su’esu’e o le a fa’atūina, o fa’amatalaga manino ma le moni, e fesoasonai i le latou galuega o lo’o faia nei.

Ia fa’aitiitia le fa’asalalau o fa’amatalaga i luga o ‘upega tafa’ilagi tusiofoliga e ono a’afia ai ma ta’ita’i sesēina ai le su’esu’ega, ma atili tuai ai le galuega o lo’o faia.

Ae ia maua pea le nofo fīlēmū o si o tatou atunu’u, i nai tinā ma tamā mātutua ma fanau, Ali’i ma Faipule o afio’aga ta’itasi, aemaise le tapuā’iga i susuga i Fa’afeagaiga ‘ese’ese i so’o se Fata Faitaulaga e fia i totonu o le atunu’u, o lo’o tau asuina le ipu vai o le ola, ma nofo tatalo, auā se manuia ma le fīlēmū o Samoa ma ona tagatānu’u.

Ia agalelei pea le Atua iā Samoa atoa e afua mai mauga mauāluluga se’ia o’o i sē ua aupito iti. Ia mamao ni ao lealea i le afioga i le Ao Mamalu o le Mālō ma lau Masiofo, Sui o le Fono a Sui Tofia ma lou Faletua, le Palemia ma le Kapeneta, le afioga i le Fofoga Fetalai ma le mamalu o Sui Usufono uma o le Palemene, le Fa’amasino Sili, Tupu ma E’e ma tagata uma lava o Samoa atoa.

Manuia tele le fa’ai’uga o lenei vaiaso, ma ia sausauina pea i tatou uma i le toto pa’ia o Iesu Keriso lo tatou Ali’i Fa’aola, ina ia tatou maua ai se Sapati fiafia ma le manuia.

Tōfā Soifua!