O le vaiaso nei, na tatalaina ai le faamanatuina o le Aso mo Fatuga'o i Le Lalolagi e fa'apenā foi ma Samoa.
I le fa’ailogaina o le Aso Fa’apitoa o Fatuga’o a le Lalolagi 2024, ua fa’atāuaina ai le sini o le, “Fatuga’o Maloloina mo Tagata Uma – Avanoa Tutusa mo tagata uma i auaunaga mo le su’esu’eina, togafitiga, ma le unaia malosi o le fa’aaogaina tatau o vailaau ma fualaau mo le tausia lelei o gasegase tau fatuga’o”.
Ua silia nei ma le 600 tagata o lo’o aumau i Samoa nei, ua tuuina atu i ai le auaunaga fa’amamatoto talu ona fa’avaeina lenei auaunaga i le tausaga e 2005. O lo’o maitauina foi le si’itia o gasegase fa’amamatoto fou i tausaga ta’itasi, ma sa ausia se maualuga e 66 gasegase fou i le tausaga fa’aletupe 2022 i le 2023.
I i fa’amaumaugaa le Fa’alapotopotoga Fa’avae Tau Fatuga’o a Samoa, NKFS, e pei ona faailoa e le Minisitā o le Soifua Maloloina, o loo ua atagia ai, e tusa ma le lata i le 30% o tagata i totonu o Samoa ua a’afia i gasegase tau fatuga’o. Mai ia lava fa’amaumauga, ua atagia ai, e silia ma le 80% o tagata ua mo’omia le fa’amamatoto, e afua le leaga o fatuga’o ona o a’afiaga o fa’ama’i le pipisi, aemaise ai le gasegase o le suka ma le toto maualuga.
O le fa’ailogaina o le Aso Fa’apitoa o Fatuga’o a le Lalolagi i lenei tausaga, faatasi ma lona sini autu o le, “Fatuga’o Maloloina mo Tagata Uma – Avanoa Tutusa mo tagata uma i ia uaunaga mo le su’esu’eina, togafitiga, ma le unaia malosi o le fa’aaogaina tatau o vailaau ma fualaau mo le tausia lelei o gasegase tau fatuga’o”, ua taūa tele lea mo Samoa i lenei vaitau ona o le maualuga o le fuainumera o tagata e a’afia i gasegase lē pipisi lea e a’afia tele ai fatuga’o.
I su’esu’ega fa’alesoifua maloloina o lo o fa’atino e le NKF, ua fa’amautu ai le tele o tagata ua a’afia i gasegase o le suka ma le toto maualuga, e latou te le o silafia o lo o a’afia latou i ia gasegase.
O le afioga i le Minisita iā Valasi Tafito Selesele sa saunoa i le saunoaga autu o lea aso, ma na ia saunoa ai e faapea.
" O le vave ona e silafia o le tulaga o lou soifua maloloina, o le vave fo’i lea ona e saili togafiti mo togafitiga e tatau ai. O le la’asaga muamua lava e taga’i i ai, aemaise lava tagata ua silia ma le 30 tausaga o le soifua, o le toe fa’amautu lea o le ituaiga o soifuaga o lo o soifua ai, e tauala lea i le fuafuaina lelei o taumafa ma ia aloalo ese mai i le ava malosi ma le ulaula tapa’a. E le gata i lea, ae fa’ataua tele fo’i le fa’agaioi o le tino e ala i galuega po o ta’aloga".
O nei fautuaga e mafai ona tu’uina atu pe a ma’ea ona faia sou siaki fa’a le soifua maloloina i so’o se Maota Gasegase po o se foma’i tumaoti, po o le tatou auaunaga NKF.
Saunoa le Minisita o le soifua maloloina i lana saunoaga autū,
"O le lē tausisia lelei o fautuaga mai i foma’i, atoa ai ma le lē usita’ia o le inumaga o fualaau, e mafai ai ona maua so’o se tagata i gasegase tau fatuga’o".
Comments