Ua fa'amaonia e le Komesina o leoleo i se feiloa'iga ma tusitala i lenei vaiaso, ia se tasi o mata'upu o loo fa'agasolo ai le su'esu'ega a leoleo o lo'o a'afia ai se faife'au i lona taumafai e fai se faiga 'aiga fa'amalosi ma le tama'ita'i 15 tausaga o lana lava 'aulotu ae peita'i o lea ua malaga i Ausetalia e malolo ai.
Na fesiligia e tusitala le Komesina ia Auapa'au Logoitino Filipo, pe o lea se mafua'aga ua mafai ai ona malaga lenei faife'au ae o lo'o iai se mata'upu o loo tu'ua'ia ai. Ae peita'i ua saunoa le Komesina o leoleo, o le taimi nei e le'i faia lava ni moliaga e fa'asaga i lenei faife'au ma e le'o iai se vaega e ono aiaia ai ni tulaga o femalagaiga i atunuu i fafo.
Na fa'ailoa e le Komesina, o le tama'ita'i fo'i sa a'afia lea na taofia i le fa'alapotopotoga o le To'omaga mo e ua Puapuagatia ua maua tala o lea ua toe ave i tua i lona 'aiga ina ua aga'i ane le 'aiga ma talosagaina le toe 'ave ai i tua.
E le'i fa'ailoaina e Auapa'au po'o lea tonu se mafua'aga ua fa'atuai ai ona faia ni moliaga e fa'asaga i lenei faife'au.
O le mata'upu lenei ua silia ma le masina talu ona tula'i mai, ma o lea fo'i ua tatala le feagaiga a le faife'au lenei ma le nu'u sa tautua ai lea na tupu mai ai lea tulaga.
O lo'o fa'aauau pea sa'iliga a leoleo e tusa o lea mata'upu o lo'o a'afia ai se tama'ita'i 15 tausaga le matua ma le faife'au.
Comments