Tusia: Demetrius Ah Mau.
O le vaiaso na te'a nei sa fa'amae'a uma ai le fa'atautaia o ta'aloga afeleti a sone ta'itasi, e le gata o Upolu nei fa'apea le motu i Savai'i. E lua vaiaso o lo'o malolo ai alo ma fanau ua mautinoa le maua o avanoa e ta’aalo ai I le sa’iliga o le siamupini o siamupini I le Aso 15 o le masina o Setema 2023.
Ua ‘amata fo’i na maitauina tapenaga ma toleniga a fanau aemaise o faia’oga ia mautinoa e lava tapena au ta’aalo ua fili mai totonu o a’oga mo lea fa’amoemoe tele, ae ua le gata I lea o le tulimata’i fo’i e le ‘au tapua’i ma le atunu’u o se tama ta’alo ma le teine ta’alo iloga o le ‘a iai lenei tausaga.
E ono faigofie matematega a le atunu’u I le Siamupini o Siamupini o ta’aloga a feleti a fanau ina ua mavae ta’aloga o Sone ta’itasi na iai le vaiaso ua tuana’i, ma ua va’ai ai le tau fai finau ma lelei uma o a’oga.
O lo'o fa'aavanoa le lua vaiaso e toleni ma tapenapena ai sui ta’a’alo uma a aoga a le atunuu.
O le 'a masi'i mai kolisi maualuluga mai Savai'i ua mafai ona saofaga mo le la’asaga mulimuli o ta’aloga afeleti o lenei tausaga.
O le taimi nei o lo'o umia e le kolisi maualuga o Sagato Iosefo mai Alafua le siamupini o afeleti o aoga uma i totonu o Samoa talu mai le tausaga e 2021.
Tulimata'i le iuga o le C.O.C po'o ai fo'i se kolisi o le a sola ma le siamupini o lenei tausaga, pe o lea nofo lava i Tumua nei, pe o le 'a sola ma se Kolisi mai Puleono.
Commentaires