Ua tapena se tagi a le susuga ia Vui Masinamua Seinafolava, e fa'asaga lea i le faipule o Faleata 3 ia Lealailepule Rimoni Aiafi, ona o ni lafoga na lafo i luga o se tasi o polokalame e fa'atautaia mai i Sini Ausetalia.
O lafoga a le afioga i le faipule o Faleata 3, ua manatu le susuga ia Vui Masinamua Se'inafolava o se taufa'amata'u lea ia te ia.
Na fa'ailoa mai e Vui i le tatou tala o mea o lo'o tutupu, ua uma ona tapena e fa'ao'o muamua le tusi i le Fofoga Fetalai o le Palemene o Samoa, ona o Lealailepule o se faipule ma e iai fo'i ta'iala ma tulafono a le Palemene, e na te manatu ua soli e Lealailepule.
Saunoa Vui, ua fa'amoemoe e fa'aoo lana tusi tagi i le Afioga i le Fofoga Fetalai, ona tapena lea o le isi ana tagi e ave i le Ofisa o Leoleo ina ia molia fa'atulafono le afioga i le alii Faipule o Faleata 3.
O saunoaga a le faipule o Faleata 3 ia Lealailepule na fai i luga o le polokalame a se tasi o ala fa'asalalau i Sini, na folafola ai se mea e fai ia Vui pe 'a va'ai ai i Samoa.
Ina ua fa'ailoa mai e Vui, e le fo'i ai i le mata'upu lenei ma ua mana'omia lava ona ave i le tulafono ma le fa'amasinoga.
O lafoga na faia e le faipule i luga o lenei polokalame, e manatu Vui; e fai sina ogaoga tele ma ua manatu ai lava ina ia fa'atino lava ala o le tulafono.
Комментарии