Tapena le talosaga 'apili a Li'o i le fa'aiuga ua fa'amuta ai lana galuega.

Ua tapena le susuga ia Li'o Fa'ataumalama Auava, e toe lu'iina le fa'aiuga ua fa'amuta aloa'ia ai ona tulaga ma tofiga fa'aleoleo mai i le matagaluega o Leoleo ma Falepuipui e tusa o le mata'upu o lo'o su'esu'eina nei.

O le Aso Lulu o le vaiaso nei lea na tuuina mai ai le fa'aiuga le Fa'amasinoga Fa'aleoleo po'o le Police Tribunal sa nafa ma le su'esu'eina o le mata'upu o lo'o a'afia ai le sa avea ma leoleo Asiasi, ma 'ua fa'amuta ai le auaunga a le alii leoleo ma le tamaitai leoleo ta'ai lua ia Henifa.

E tusa o le fa'ai'uga, ua fa'amaonia ai moliaga e tolu a le susuga ia Lio ae lua moliaga fa'asaga ia Henifa, ma o nei moliaga e so'otaga lea i le mata'upu o le su'esu'ega sa o la'ua faia e uiga i le maliu o le talavou o Tuuau Faasavalu na maliu i le tausaga e 2021 i le masina o Aperila i le nuu o Vaitele Uta.

Ua tuuina mai ai nei aso 7 e amata mai i le aso na fofogaina ai le fa'aiuga, ina ia faia ai se apili po'o le leai fo'i e tusa o le fa'aiuga a le fa'amasinoga fa'aleoleo.