O le faaiuga o le vaiaso ga tatala aloia ai le ofisa leisi lala o le Moana Rentals i le malae va'alele faavao malo i Faleolo
O le Afioga Patele Iosefo Mulipola ga taitaia le lotu faafetai, ae o le Afioga ia Tuimalo Jane Lo Tam, o se tasi o tuaa o susuga i Faatonu o le Kamupani ga ootiina le lipine e tatala aloaia ai lenei galuega ma nofoaga fou o le Moana Rentals i Faleolo
O le tasi o Faatonu o le Kamupani, le Afioga ia Tuala Peseta Faimalotoa Allan Stowers, ga fai ma sui o le kamupani e faafetaia le ta'ita'i o le sauniga ma le ituaigasa faapea le mamalu o le au valaaulia ga faa-tumulia ai lea afiafi faapea aiga ma uo
Na faafetaia e le Pulega le lagolago a le atunuu faapea turisi o lo'o faaogaina le auaunaga ua alualu ai pea i luma taumafaiga a le Moana Rentals. Sa momoli fo'i le faafetai i le Pulega a le Samoa Airport Authority mo le faiga paaga ua mafai ai oga fausia ofisa o le Moana i lea vaega o le malae va'alele i Faleolo
Na taua e le Tamaitai Pule o le Moana, Afioga Liliolelagi Anette Chang, ose faamama avega tele lenei ofisa fou i Faleolo mo paaga uma a le Moana faapea fo'i mo le aufaigaluega i le siitia ai o le tautua ma le auaunaga mo le mamalu o le atunuu
O le ofisa fou lenei o le Moana pe a ma le 5 minute mai le malae va'alele pe a aga'i i le uafu i Mulifanua, e ese mai lona ofisa o lo'o i totonu o le malae va'alele faapea fo'i lona ofisa autu i Alafua
Σχόλια