28 Setema 2022
PC: ABC Australia News
I le mae’a ai o le fono tele ma felafolafoa’iga a ta’ita’ini mai atunu’u uma o le lalolagi o lo’o i lalo o le fa’amalu o le Malo ‘au fa’atasi i le vaiaso ua tuana’i lea na talimalo ai Amerika.
Ua soso’o ane ai nei ma le isi fonotaga a le peresetane a Amerika o Joe Biden ma taitai o le Pasefika lea o lo’o faia i le fale pa’epa’e i Uasinitone.
O lenei fonotaga ua talanoa ina ai nisi o manatu mai taitai taitasi o atunu’u o le pasefika i vaega e ao ona galulue fa’atasi ai ma Amerika ae o se tali atu foi ini fuafua a le malo tele o Meleke o fa’atulaga mai o atunuu o le Pasefika.
Mo Samoa lava ia, na laga ai e le tama’ita’i palemia o Samoa Tutoatasi ia Fiame Naomi Mata’afa le mataupu o polokalame fa’amiliteri.
Na ta’ua e Fiame, o le tautinoga i le va o atunu’u o le Pasefika ma le Iunaite Setete o se “tulaga lautele” ma ua ave le fa’amuamua i suiga o le tau, lea ua vaaia o se tulaga lamatia tele o le saogalemu o le itulagi.
Saunoa le tama’ita’i Palemia, e iai foi talanoaga taua e uiga i le saogalemu o le gataifale.
“E le gata i le puipuiga o faiga faiva, ae faapea foi ma tuaoi o le gataifale,” o le fa’aaliga lea a le tamaitai palemia i lana lauga i lenei fonotaga.
Na fa’amamafa e le palemia o Samoa le taua o le fa’atumauina o le filemu i totonu o le itulagi, ma na ia taʻua e le manaʻo e vaʻai i le faʻateleina o polokalame faafitafita ma militeri a Amerika i le Pasefika.
"A amata ona e talanoa e uiga i le puipuiga, o loʻo e vaʻavaʻai i faʻataʻitaʻiga o le a omai ai isi atunuʻu poʻo le va’ai i tulaga o malosiaga fa’afitafita ma pulega fa’amiliteri i totonu o le Pasefika," o lana saunoaga lea.
"Matou te le manaʻo e faʻamalosia lena mea i soʻo se auala."
Комментарии