20 Tesema 2022.
Na te'ena e sui faipule e to'atolu na fa'amavae mai ma le vaega fa'aupufai e Puipuia Aia Tatau a Tagata (HRPP) moliaga na faia e le Fofoga Fetalai e fa'asaga ia'i latou e tusa ai lea ma le fa'asinoala a le tulafono o Faigapalota 2019.
O le moliaga na faia e le Fofoga Fetalai ina ua fa'amavae le faipule o Faleata 4 ia Ale Vena 'Ale, faipule o Si'umu ia Tu'u'u Anasi'i Leota ma le faipule o Va'a o Fonoti ia Mau'u Siaosi Puepuemai, e tusa ai ma le tulafono o faigapalota e tatau ai e se sui usufono ua fa'amavae mai i se vaega fa'aupufai ona toe fo'i e fai le faiga palota laitiiti mai i lona itumalo.
I le usuia ai o le fono a le Palemene mo lana tauaofiaga mulimuli o lenei tausaga 2022, sa tu'u ai le avanoa e le Fofoga Fetalai e saunoa sa'o ai sui sa molia ma fa'amavae mai i le HRPP ina ia tu'uina sa'o atu a latou tali pe e tete'e i moliaga a le Fofoga a le Fono pe ioeina.
Peita'i sa te'ena uma lava e sui faipule nei e to'atolu moliaga ma ua fa'ase'e atu ai nei lenei mata'upu mo se fa'aiuga mai i le fa'amasinoga sili a Samoa.
コメント