Aufaipese Kolisi Fa'afaife'au Mālua| Ata Pueina: S.T.A.
03 Setema 2023: Ua tatala aloa'ia faafiafiaga o le Teuila o lenei tausaga 2023 e pei ona iai sauniga lotu sa fa'ataunu'uina i le Maota o Tupulaga i Sogi.
O le sauniga na tatala aloa'ia e le pule o le kolisi Fa'afaife'au a Mālua ia Rev. Dr Vaitusi Nofoa'iga ae lagiina pese e le Koli Faafaifeau.
O le fē'au o le talalelei na tōmua ai le lāuga i le tatalaina o le Teuila e fa'apea, 'O MEA UMA UA FAIA E LE ATUA;AUĀ UA FA'APA'IAINA.'
O le māe'a o le sauniga 'amata e tatala ai polokalame o le Teuila i lenei vaiaso, ona sosoo lea ma le lauga a le mālō i le afioga i le ta'ita'i o le atunu'u ia Hon Fiamē Naomi Mata'afa.
O le fa'afetai a le Mālō ona ua toe fa'aauauina le faamanatuina o le Teuila talu ona taofia potopotoga ma Aso Faamanatu ona o aafiaga o le Koviti 19. O le tausaga lenei, o se tausaga o luitau i tamāoaiga ma atina'e ae mafuli lava i le toe fa'alaleia o atina'e o tagata maimoa mai ma le tau toe fa'aleleia o ana tupe maua.
Saunoa Fiamē, talu mai Aukuso o le tausaga ua tuana'i ina ua toe tatala malaga fa'avaomālō; ua maitauina ai le si'itia o tupe maua a Samoa ona o pā'aga asiasi ma o tatou lava tagatanu'u femalāga'i mai i faalavelave o aiga ma so'o lava se fa'amoemoe.
O le sauniga i le afiafi o le Aso Sā ua aloa'ia ai le faamanatuina o le Teuila lona 33 a Samoa, ma o se aso fa'amanatu e ave ai le fa'atāua i atinae o tagata tafafao maimoa mai i lo tatou atunu'u.
I le māe'a o saunoaga autū, na amata ai ma pesepesega fa'aleagaga na tapenaina e ni isi o aufaipese sa lautogia.
O le aufaipese a le Ofisa a le Ekalesia Metotisi o Foga'a i Faleula, Aiga Fesilafa'i a le Ekalesia Katoliko i Vaitele Fou ma Nu'u Fou, Ekālesia Fa'apotopotoga Kerisiano i Samoa a Tanugāmanono ma le Ekalesia a Iesu Keriso o le Au Pa'ia o Aso e Gata Ai i le Stake o Apia Samoa Central Choir.
O le Aso Gafua 04 Setema o le 'ā amata ai polokalame fa'agasolo e pei ona faatulaga i le 9am i le taeao i le 7pm i le afiafi.
O poloakalame o le afiafi ua faatulaga mai o le 6pm e fai ai fa'amalositino i le Friendship Park, 6:30pm o faigā fagogo ma tala ona taulauga lea i fa'afiafiaga fa'aleaganuu i le 7pm ma po ai faafiafiaga o le Aso Gafua .
Comentarios