To'atasi ua fa'amaonia le maliu i le fa'alavelave tau ta'avale afi na tula'i mai i Malifa ananafi.

Ua faamaonia e le Komesina o le Matāgaluega o leoleo ia Auapaau Logoitino Filipo, e toatasi se tamā matua ua uma lona soifua ona o le faalavelave lea na tulai mai i le Aso Gafua i Malifa.

O le pasi a le Laumosooi, sa tupu se faaletonu i taofi ma le mafai ai ona tāofiofi e le avepasi le ifo mai lalo i le pi'oga o loo i le magafā i le vaega tonu o loo iai le le Ofisa l Aoga ma le Kolisi o Leifiifi.

Na sosofa mai e le pasi laupapa lenei tua o se tasi o taavale tōtino ma tifa ane ai i le isi itūala, lea na taliana ai ma malepe ai le fale.

O le mata'utia tele o lenei faalavelave na tūgā ai ni manu'aga o le atunuu sa malaga mai i le pasi lenei e faamoemoe mo le taulaga i Apia.

O loo taofia ni isi o fanau ma tagata matutua i le falema'i o Tuiatua Tupua Tamasese Meaole i Motootua ona o ni manu'aga tigaina.

E lei iai se isi ua molia i lenei faalavelave.