Toe fo'i mai i Samoa le va'a o MS Sapphire Princess talu mai le 10 tausaga.

MS Sapphire Princess i le uafu i Matautu | Photography by Nah Folasa|Blutv.

O le taeao nei-Aso Lua 14 Novema 2023, na taunu'u ai mataula i le uafu va'a fa'avaomalo a Samoa i Matautu le sa o le MS Sapphire Princess.

U 10 ai nei tausaga fa'ato'a toe aga'i mai lea o le va'a nei i Samoa, o se va'a mo tagata tafafao ma maimoa; ma o se tasi o va'a tele ua afea ogasami o le atunu'u i ana malaga ta'amilo.

E tusa ma le 1066 le aofa'i o tagata faigaluega i luga o va'a lenei ae 2444 le aofa'iga o le pasese.

Na amata mai le malaga 32 aso a le va'a lenei i Los Angeles, Kalifonia ma taunu'u atu ai i Pagopago-Amerika Samoa. Ua iai le fa'amoemoe, o le mae'a atu ai o lana asiasiga i Samoa o le 'a malaga sa'o atu ai loa i le malo o Fiti ma Farani Polenisia a'o le'i toe taliu atu ai i Kalifonia.

I le silia ma le 3000 o tagata o lo'o i luga o le nei va'a, e 66 atunu'u ese'ese o lo'o iai ma o le to'atele o tagata Amerika.

O se taimi muamua fo'i lenei talu ona mae'a le Misela ma le Koviti, o le 'a toe tatala ai avanoa mo a'oga Iunivesite e asia ai luga o lea va'a ma matau tulaga o galuega aua lava mata'upu o lo'o a'oa'oina aemaise ai lava le aloga mo ali'iva'a a le Iunivestia aoao o Samoa le Papa i Galagala.

O le toe afea ai e le va'a lenei o Samoa, ua o se fa'amauiaga mo le 'au faipisinisi mea taulima, felaua'iga, aemaise o le Ofisa o Tagata maimoa mai Fafo(S.T.A)