I le se'ei mai ai o le afioga ia Mase Mahonri Schwalger e fa'auauina tofiga o le faiaoga ulu mo le Manu Samoa 15 ua iai nai suiga e le gata i le fa'atapenaina o le 'au mo ana ta'aloga o lo'o loma mai e pei ona iai ta'aloga o le a faia i laufanua o Samoa nei ile aso 5 ma lse aso 13 o le masina lenei o Iulai.
I se feiloaiga a tusitala ma le pulega a le Manu Samoa na fa'ailoa ai e le susuga ia Mase Mahonri Schwalger le tofia ai o le ali'i o Theodore McFarland e avea ma kapeteni o le Manu Samoa e ta'ita'iina le 'au mo ana ta'aloga o lo'o ua loma nei.
Na saunoa le faiaoga ulu i le tulaga e pei ona iai le tula'i mai o McFarland i le ta'ita'iina o le 'au ae le gata i lea o le fa'aaloalogia mai ile mamalu o le atunu'u ma o le tofia ai o Mcfarland e avea ma kapeteni o lana silasila mamao mo le ipu o le lalolagi i le tausaga 2027.
O le ali'i o Theodore McFarland 28 tausaga le matua sa ta'aalo mo le kalapu lakapi a le Moamoa Rooster mai i le afioaga o Moamoa o se tasi o sui filifilia o le Manu Samoa i le ipu o le lalolagi ua mavae atu ma o lo'o ta'alo ai i lana kalapu fa'akonakarate English Premiership Rugby club Saracens i Lonatona.
Comments