Sa fa'asalaina le kamupani Va'alele a le atunuu o le Samoa Airways, i le tau'aveina lea o se tasi o le pasese e leai pule fa'atulafonoina e mafai ai ona ulufale i le Teritori o Amerika ia Amerika Samoa.
O le pasese o le sa 'avea ma Minisita Lagolago o le Kapeneta ia Fepulea'ia Fa'asavalu Faimata Su'a, na maua mulimuli ane ina ua taunu'u i Amerika Samoa e leai sona pemita mo le 30 aso e mafai ona ulufale ai i le Teritori.
Na fa'ailoa e le faipule, na fa'apea lava ia e mafai lava ona malaga ma ulufale i Amerika Samoa i lana tusifolu fa'alemalo.
O le tula'i mai ai o lenei mata'upu, na fautuaina ai loa e le Palemia afioga Fiame Naomi Mata'afa le alii faipule ina ia fa'amavae mai ma le tofiga o le Minisita Lagolago o Leoleo ma Falepuipui.
Fa'ailoa i se Pepa o Fa'amatalaga a le Loia Sili a Amerika Samoa, o le fa'aslaina ai o le Samoa Airways, ona ua le mafai ona mulimulita'ia ta'iala o le tiute ma le matafaioi a se kamupani va'alele i le mata'ituina o alafua ma tulafono ia fa'amalosia o tagata femalaga'i.
E tusa ai ma le vaega o tulafono, o lo'o aiaia ai e tatau i pule, kapeteni, tagata faigaluega po'o so'o se isi i 'au'aunaga va'alele ona fa'asalaina i le le usita'ia o 'aulape mo le fa'atinoga o galuega tau i femalagaina.
E tusa ai ma le tulafono, e $1000 tala Amerika le sala ae e talu ai ona o lenei mata'upu sa o'o atu se fa'amaualaloga a le Pule Sili o le Samoa Airways aemaise o le malo o Samoa, o lea ua tu'uitiitia ai i le $500 Amerika le fa'asaga.
O le aso 3 o Tesema lea na fa'atulaga e tatau ona o'o atu ai ua totogi lenei seleni i le malo o Amerika Samoa.
Comments