07 Oketopa 2022
O se fiafiaga sa iai le atunu’u ina ua lau le lisi o le Manu Samoa i lenei vaiaso mo lana malaga ta'amilo ia Novema i Enelagi ma aofia mai ai ma le igoa o se tasi o alo o le atunu'u na ta'alo mo le 'au a Niu Sila le All Blacks, 'ae peita'i ua toe maua se tala ua lē mafai ona ia ‘auai i le malaga ta'amilo ona o lo’o mālōlō pea o ia ini manua'ga talu mai nisi o ta'aloga ua mavae.
O l e faiā’oga ale Kalapu o le Bristol i Peretania lea o lo'o ta'alo ai Steven Luatua le susuga ia Pat Lam na ia fa'amaonia mai lea tulaga.
O Steven Luatua sa fa'amanuiaina ma ta'alo mo le All Blacks i ana ta'aloga fa'avaomalo e 15, o le tausaga e 2016 le tausaga mulimuli na ta'alo ai mo le All Blacks ae le'i saini ina lana Konekarate e ta'alo ai mo le kalapu a Bristol i Enelagi.
O lona uiga o lea ua mae’a lona taimi e ta'alo ai mo 'au fa'avaomalo e pei o Niu Sila 'ae ua mafai ona ia agava’a e filifili lona atunuu e ta'alo ai e fa'apenā fo'i mo le ipu ole lalolagi ‘ina ua fa'apēnā ona toe sui le tulafono o le Lakapī ‘a le Lalolagi il e piriota e tatau ai ona 'ausia fa'ato’ā mafai lea ‘ona agava’a e ta’alo mo lona atunu'u.
MANU TU’ILAGI.
O le isi alo o Samoa olo’o ta’alo i le kalapu a le Sale Sharks ia Manu Tu’ilagi ua ia fa’ailoa ua le toe mamao se taimi ona ia ‘ofu lea o le lanumoana.
O Manu Tu’ilagi ua iai le fa’amoemoe e fa’amae’a ise taimi ole tausaga lenei lana Konekarate o lo’o ta’alo ai i le Sale Sharks.
O se tasi lenei o alo o Samoa e tupuga mai ise ‘aiga e ta’a’alo i le ta’aloga lenei Lakapi e pei ona iai nisi ona uso matutua ua lauiloa i lea ta’aloga, e iai le susuga ia Freddy, Alesana Tuilagi, Anetele’a, Henry ma Vavae Tu’ilagi.
E le’i toe maua mai se fa’amatalaga i le pulega o le ‘au Manu Samoa pe iai nisi fesuia’iga i le toe mālōlō ai lea o Steve Luatua.
Comments