29 Novema 2022.
O le Aso To’ona’i 26 Novema 2022 na potopoto ai le itumalo o Faleata #1 i Vaimoso e fa’aalia le ituaiga o seleselega mai a latou fa'ato'aga ma faigafaiva, fa'apea fo'i galuega taulima.
O se fiafiaga i le afio'aga ona o lea fa'amoemoe na maua ia ma le avanoa e auai atu ai ni isi o Minisita o Fa’atoaga a le Pasefika ma
Vaomatua o lo'o 'auai mai i le fono o atumotu laiti a le Pasefika lea na tatalaina i le taeao lenei o le Aso Gafua 28 Novema 2022 i le faletalimalo a le Tanoa i Sogi.
O le susuga ia le Fa'afeagaiga ia Rev Amosa Reupena o le ekalesia EFKS i Vaimoso sa taitaia le sauniga lotu.
O Paletasala Tovale, na fa’afeiloa’ia aloa’ia ai malo fa’apitoa, o ta’ita’i o le malo ma i latou uma sa auai e faamanatu le Ulua'i Seleselega a Faleata #1.
I le saunoaga autu a le Minisita o Faatoaga ma Faigafaiva, Afioga Hon. La’aulialemalietoa, Na faamamafa i le saunoaga a Leuatea Polataivao Fosi Schmidt le taua o nei taumafaiga a le malo, ma fa’amalosia le itumalo e fa’aauau pea ona galueaina o latou fanua ma 'ia mautinoa le saogalemu o taumafa i nuu ma afioaga, faapea foi ma le lava o fua o faatoaga mo tatou suiga o oloa faaulufale mai ma taumafaiga e auina atu i fafo.
O le mamalu o le atunuu ma le auvalaaulia faapitoa na maua le avanoa e molimauina ai le seleselega po'o fa'aaliga o fua o fa'ato'aga ma faigafaiva na fa'atulagaina e le itumalo.
Sa maua fo'i avanoa e tofo ai i nisi o taumafa fa'a-Samoa, e aofia ai le fa'ausi ma le suafa'i.
Na faafetaia e le tulafale o le afioaga o Tomaagauaune Faaletonu le Malo o Samoa i le lagolago faifaipea e ala i lenei fuafuaga o le Ulua'i Seleselega ma na ofoina atu ai fpo'i i le itumalo ni meaalofa e fai ma faailoga o latou talisapaia o lea fo'i fa'amoemoe.
O le Matagaluega o Faatoaga ma Faigafaiva o lo'o lagolagoina le fuafuaga o le Ulua'i Seleselega ma ofoina atu ai fo'i i le itumalo ni mea faigaluega mo fa'ato'aga, fuala'au 'aina, o la'au fa'atasi ai ma se meaalofa tupe mo le Itumalo.
PC: Government of Samoa
Comments