O le Minisita mo Tagata Atumotu o le Pasefika, Afioga Aupito William Sio sa fai ma saunoaga a'ami o le faau'uga a le Aoga Samoa Lupe Fofoa I Vaoese ile Aso Toonai i Mangere Aukilani.
Sa auai foi ma o se tasi o malo fa'aaloalogia o lea faamoemoe, ole Afioga lea ile Alii Minisita o Leoleo ma Falepuipui a Samoa Afioga, Faualo Tauiliili Lefau Fao Harry Schuster.
Sa saunoa le Minisita mo tagata Atumotu ole Pasefika, Aupito Su'a William Sio i luga o upega o fa'amatalaga po'o le social media e faapea "O se avanoa lelei le auai faatasi ai ma le Minisita o Leoleo a Samoa, le afioga Faualo Harry Schuster e molimauina le faamanuiaina ma le faauuga o fanau aoga sa auai i le “Lupe e Fofoa i Vaoese”
"o se vasega o le gagana Samoa ma le aganuu o loo aoaoina ai le faatinoga o nafa ma auala e mafai ai e i latou o lo'o tauaveina le ta'ita'i po'o matai o latou aiga, ona mautinoa i le fa'atinoina o latou matafaioi fa'a ta'ita'i i se tulaga fa'a-Samoa."
O lenei vasega e aofia ai le mauaina o le tatau fa'asamoa mo alii ma tamaitai pea mae'a ai le 4 masina ilekuata. O se fa'auuga tulaga ese ile va'ai ma e aofia ai le mauaina e le vasega o latou tusi pasi ae o le faia fo'i o le sauniga fa'aleaganu'u o le 'Samaga Pe'a' e fa'amae'a ai le mauaina atoa o le tatau fa'aleaganu'u i luma o o latou aiga - e pei lava ona faatinoina i totonu o se nu'u. Sa sili ona ou fiafia ona sa faia foi le vasega i luga o le initaneti ma sa auai mai ai tamaiti aoga mai Ueligitone ma isi vaega o le Atunuu. Faamalo ia Asiata Falemalu Pio Vaoliko ma lou faletua ia Tuugaita Hanna Vaoliko ma BluWave." - (O le saunoaga ga le Afioga le Minisita, Aupito William Sio)
E silia ma le 30 tagata na faauu mai le Vasega amata ma le Vasega toe fafagu, ae to'a 12 sa faapea ona ta latou malofie, e to'a 5 sogaimiti ae 7 malu.
Saunoa le Pule Aoga o le Lupe Fofoa i Vaoese, Asiata Pio Vaoliko, o le auga po'o le manulauti o le aoga ina ia mafai e le tagata lava ia ona tautala ma faatino matafaioi fa'asamoa i totonu o lona aiga faapea i meafaitele a le Atunuu.
Sa faafetai foi le susuga le Alii Pule ia Asiata kamupanī ma pisinisi sa tu'u mai lo latou tau'au ile faamoemoe.
Bluwave, Pacific Business Hub, Pacific40 - Talofa Voucher, Tasi Market , fa'apea foi le lagolago a le Ministry for Pacific Peoples ma Pacific Business Trust e lē gata i lea tapaau ma aiga ole Laumua pele i ona tulaga faalupe i mea uma ma Annie's Decor's o matua, o aiga ma uo ma e masani sa mafai na auai atu.
E mafai ona e resitara mo le aoga luga le upega tafailagi www.lupefofoaivaoese.com
Comments