Aiseā e mana‘omia ai ona lesitala ina ia palota?
Afai ua e lesitala e palota, o le a mafai ona faaali sou finagalo i faigapalota lautele, faigapalota faaitumalo ma fesili faapalota poo pelepesite. O faigapalota o se avanoa e faaali ai sou finagalo poo ai le tagata e fai ma ou sui i mataupu e tāua ia te oe.
E mafai ona e faamautinoa e amana‘ia lou manatu e ala i lou lesitala e palota.
O ai e mafai ona lesitala ina ia palota?
E tatau ona e lesitala pe afai:
ua 18 ou tausaga pe sili atu, ma
o oe o se sitiseni Niu Sila pe nofomau i Niu Sila, ma
e silia ma le tausaga talu ona faaauau pea ona e nofo i Niu Sila i se vaitaimi o lou olaga.
Afai o oe o se Ausetalia, Atu Kuki Māoli, Niue poo se To‘elau, e mafai ona e lesitala pe afai ua 12 masina talu ona e nofo faaauau (permanent resident) i Niu Sila. Afai e te nofo i atunuu mamao, e mafai ona e lesitala mo le Faigapalota Lautele o le 2023 pe afai:
o oe o se sitiseni Niu Sila ma sa e iai i totonu o Niu Sila i le 6 tausaga talu ai, poo
oe o se tagata nofomau o Niu Sila ma sa e iai i totonu o Niu Sila i le 4 tausaga talu ai.
Pe a mae‘a le palota o le 2023, o le a toe suia i le mea sa iai o le 3 tausaga mo sitiseni Niu Sila ae 12 masina mo tagata nofomau o Niu Sila. Mo fuafuaga tau palota, o se tagata nofomau (permanent resident) o se tasi o loo nofo faatulafonoina i Niu Sila ma e lē o mana‘omia ona toe tuua le atunuu i se vaitaimi ma‘oti.
E aofia ai se tasi o loo iai se visa e nofo ai (resident visa). E mafai ona e lesitala pe a atoa le 17 o ou tausaga. Pe a atoa lou 18, o le a otometi ona e lesitala ma o le a e sauni ai e palota.
E faapefea ona ou lesitala?
E faigofie ona lesitala pe faafou ni ou faamaumauga. E mafai ona e:
asiasi i le vote.nz ma faaaogā ai lou laisene avetaavale Niu Sila, tusifolau Niu Sila poo lau RealMe ua mae‘a ona iai lou pepa faamaonia ina ia lesitala ai i luga o le initaneti
vili fua i le 0800 36 76 56 ma talosaga mo se pepa faatumu e lafo atu ia te oe Pe a mae‘a ona e lesitala, o le a alu lou suafa i le lola palota.
E tatau ona e iai i le lola palota ina ia palota ai. E mana‘omia ona toe faafou ou faamaumauga i taimi uma e te sifi ai.
O e mana‘omia se fesoasoani i le lesitala?
E mafai ona e fesili i se tasi e te iloa, e pei o se uō poo se tauaiga, pe fesili foi i la matou vaega o le lesitala, ina ia fesoasoani atu i le faatumuina o lau pepa o le lesitala, pe na te faatumuina foi lau pepa mo oe.
E mana‘omia ona e sainia le pepa faatumu. Afai e te silafia se tasi e lē mafai ona ia faatumua ma saini lana pepa faatumu o le lesitala ona o le lē atoatoa o le malosi o le tino poo le mafaufau, e ono mafai ona e fesoasoani iai.
Alu i le vote.nz ina ia maua ai nisi faamatalaga e faatatau i le fesoasoani i se tasi e lesitala ina ia palota
Mo nisi faamatalaga uiga i le lesitalaina ma le faatinoina o palota:
asiasi i le vote.nz
valaau le 0800 36 76 56 O faamatalaga e uiga i le lesitalaina ma le faatinoina o palota o loo maua i isi gagana i le vote.nz
Comments